Granıtnyı kentindegi ES 166/25 mekemesinde 500 – ge jýyq azamat jazasyn óteýde. Olardyń 60 - tan astamy tigin sehynda eńbek etedi. Qazirgi jumys maska tigý.
– Qazir men Respýblıkalyq «Eńbek» mekemesi arqyly jumysqa ornalastym. Ekinshi konveıerde tiginshi-motorıst bolyp jumys isteımin. Medısınalyq maskalar tigemiz. Koronavırýs epıdemııasyna baılanysty biz Aqmola oblystyq qylmystyq atqarý júıesi departamentine qoldaý tanytqymyz keledi. Qarttar úıine arnap maskalardy tegin tigýdi bastadyq. Sóıtip biz búgingi qoǵamda taraǵan qaýipti indetpen kúresýge ózindik úles qosqymyz keledi,–deıdi jazasyn óteýshi.
Qazir táýligine 2 jarym myńnan astam maska tigiledi. О́nim sertıfıkattaýdan ótken ári allergııa jáne shań-tozańnan qorǵaý talaptaryna sáıkes keledi. Betperdeniń eki túri tigiledi. Biri eresek adamdarǵa laıyqty bolsa, ekinshisi balalar men jasóspirimderge arnalǵan.
–Qazaqstan aýmaǵynda bastaý alǵan respýbıkalyq «Biz birgemiz» aksııasynan qylmystyq atqarý júıesi departamenti de qalys qalmaýda. Osy rette eńbekpen túzetý mekemelerinde qoǵamnyń osal toptaryna tegin maska tigý týraly sheshim qabyldanǵan. Bastamaǵa jazasyn óteýshiler de kómektesýge nıetti ekendikterin bildirdi,–deıdi ES 166/25 mekemesi bastyǵynyń orynbasary Sultan Qusaıynov.
Daıyn maskalardyń bir parasy Kókshetaý qalasyndaǵy qarttar men múgedekterge arnalǵan «Úmit Shańyraq» ortalyǵyna tabystaldy.
Qazirgi tańda respýblıkalyq «Eńbek» kásiporynynyń 3 bólimshesi maska tigýge jumyldyrylǵan. Naýryzdyń 20-synan bastap túrli tapsyrys boıynsha bas aıaǵy 50 myńnan astam maska tigilipti. Qajetti bolǵan jaǵdaıda daıyn ónim kólemin eki esege arttyrý da kózdelip otyr.
