Ár túrli messendjerlerde azyq-túlik sebetterin jetkizý úshin kópbalaly analarǵa 109 baılanys ortalyǵyna habarlasý qajettiligi týraly taratylǵan aqparat shyndyqqa janaspaıdy. Ataýly áleýmettik kómek alatyn qazaqstandyq otbasylardyń 1 jastan 18 jasqa deıingi balalaryna 2020 jylǵy 1 qańtardan bastap kepildik berilgen áleýmettik toptama usynylǵan bolatyn. 1 jastan 6 jasqa deıingi balalarǵa arnalǵan áleýmettik toptama azyq-túlik jıyntyǵy men turmystyq hımııa taýarlarynyń jıyntyǵyn qamtıdy. 6 jastan 18 jasqa deıingi balalar úshin mektepterde ystyq tamaq, oqý quraldary men mektep kıimderin berý kózdeldi. Sondaı-aq, osy sanattaǵy balalar úshin mektepke deıingi jol júrý aqysy tólenip keledi.
- Sonymen qatar, Memleket basshysynyń tapsyrmasy boıynsha Eńbek jáne halyqty áleýmettik qorǵaý mınıstrligi tótenshe jaǵdaı kezinde azyq-túlik pen turmystyq jıyntyq alýshylardyń tizimin jasady. Jıyntyq quny – 5647 teńgeni quraıdy. Jıyntyqty toptama túrinde nemese aqshalaı berýge bolady delingen. Sondyqtan, atalǵan kómekti tezdetip halyqqa jetkizý maqsatynda jáne de adamı qarym-qatynasty, kópshilik toptasýdy boldyrmaý Mańǵystaý oblysy boıynsha ár balaǵa 5567 teńgeden aqshalaı berý qajet sanaımyz, dedi Jumyspen qamtýdy úılestirý jáne áleýmettik baǵdarlamalar basshysynyń mindetin atqarýshy Jaısańgúl Dospolova.
Joǵaryda atalǵandaı tótenshe jaǵdaıǵa baılanysty azyq-túlik toptamasy men hımııalyq quraldar satyp alý úshin árbir balaǵa 5567 teńgeden tólem júrgiziletin bolady. Tólem ataýly áleýmettik kómek alyp otyrǵan analardyń esep shottaryna, ıaǵnı banktik shottary (bankomattaryna) túsetin bolady. Atalǵan kómekti alý úshin eshqaıda baryp, qujat tapsyrýdyń qajeti joq.
Budan basqa, karantın jarııalanǵan aımaqtarda azyq-túlik pen turmystyq jıyntyq AÁK alatyn otbasylardyń eresek múshelerine, onyń ishinde kópbalaly otbasylarǵa, barlyq jastaǵy I jáne II toptaǵy múgedekterge, sondaı-aq múgedek balalarǵa, múgedek balany kútýmen aınalysatyn ata-analarǵa beriletin bolady.
Mańǵystaý oblysy
