Qazirgi kezde shet memleketterdiń kóptegen buqaralyq aqparat quraldary dál osyndaı habar taratýda. San márte álemniń eń úzdik fýtbolshysy jáne qart qurlyqtyń eń úzdik surmergeni retinde tanylyp, basqa da kóptegen ataqtardy ıelengen dańqty portýgalııalyq shabýylshy 2018 jyly Madrıdtiń «Realynan» Týrnınniń «Iýventýsyna» aýysqan edi. Sol kezde Krıshtıaný Ronaldýdyń transferlik quny 112 mıllıon evroǵa baǵalandy. 35 jastaǵy shoq juldyz Italııanyń A serııasynda da jasyndaı jarqyrady. Bıylǵy maýsymda ótken túrli týrnırde 32 ret jasyl alańǵa shyqqan ol 25 goldyń avtory atanyp, tórt ret nátıjeli pas berdi. Talaı mańyzdy matchtarda óz komandasyn alǵa súırep, jeńiske jetýine súbeli úles qosty.
Koronavırýstyń kesirinen álemniń ózge de fýtbol klýbtary sekildi «Iýventýs» ta mol shyǵynǵa batty. Aldaǵy ýaqytta olar Ronaldýǵa burynǵy jalaqasyn tóleı almaýy da ábden múmkin. Qazirgi kezde týrındik klýb tek aıtýly fýtbolshy úshin ǵana jylyna 31 mıllıon evro mólsherinde qarajat jumsaıdy eken. Sol sebepti de olar 35 jastaǵy portýgalııalyq surmergendi satyp jiberýi de múmkin.
