Alqaly jıynda depýtattar «Ardagerler týraly» zań jobasyn jan-jaqty talqylap, qoldaý kórsetti. Bul zań jobasyn tanystyrǵan Eńbek jáne halyqty áleýmettik qorǵaý mınıstri Birjan Nurymbetov qujat ardagerlerdi áleýmettik qorǵaýǵa baılanysty qoǵamdyq qatynastardy retteıtin zańnamalyq aktilerdi júıeleý, qaıta qaraý jáne ardagerlerdiń jańa sanattaryn qalyptastyrý maqsatynda ázirlengenin atap ótti.
Onyń aıtýynsha, zań jobasy ardagerlerdiń áleýmettik qorǵalatyn sanatynyń mártebesin aıqyndaýdy kózdeıdi. Birinshisi – ol UOS ardagerleri. Bul sanatqa soǵysqa qatysýshylar jáne UOS múgedekteri jatady.
Ekinshisi – basqa memleketterdiń aýmaǵynda urys qımyldarynyń ardagerlerine qatysty. Zań jobasyna sáıkes olarǵa Aýǵanstandaǵy urys qımyldaryna qatysqan áskerı qyzmetshiler, sondaı-aq 1992 jyldan 2001 jylǵa deıingi kezeńde tájik-aýǵan ýchaskesinde TMD-nyń syrtqy shekaralarynyń syrtqy qorǵanysyn kúsheıtýge qatysqan, 1968 jyly Chehoslovakııadaǵy janjaldy retteýge, Taýly Qarabahtaǵy etnosaralyq janjaldy retteýge, Iraktaǵy bitimgershilik operasııalaryna qatysqan ulttyq kontıngenke kiretin azamattar sanaty jatady.
Úshinshisi – jeńildikter boıynsha UOS ardagerlerine teńestirilgen tulǵalar sanaty. Bul qatarǵa jeńildikter men kepildikter boıynsha UOS qatysýshylaryna teńestirilgen azamattardyń 8 sanaty jáne UOS múgedekterine teńestirilgen azamattardyń 5 sanaty kiredi.
Tórtinshiden, eńbek ardagerleri qamtylǵan. Olar – Sosıalıstik Eńbek Erleri, úsh dárejeli Dańq, úsh dárejeli Eńbek Dańqy ordenderiniń ıegerleri, Qazaqstannyń Eńbek Eri ataǵyna ıe bolǵan tulǵalar, 1941 jylǵy 22 maýsymnan 1945 jylǵy 9 mamyr aralyǵynda kemine 6 aı jumys istegen, áskerı qyzmet ótkergen jáne Ekinshi dúnıejúzilik soǵys jyldary tyldaǵy janqııarlyq eńbegimen minsiz áskerı qyzmeti úshin burynǵy KSRO ordenderimen jáne medaldermen marapattalǵan adamdar.
– Zań jobasynda ardagerlerge qatysty áleýmettik qoldaý sharalary qarastyrylǵan. Mınıstrlik óz kezeginde ardagerlerge qyzmet kórsetýdi belsendendirý baǵytynda quqyqtyq aktilerge tolyqtyrýlar engizip, ardegerlerdiń qoǵamdyq birlestikterimen, kásipodaqtarymen, jergilikti atqarýshy organdarmen birlesip, tıisti jumystar atqarady. Quqyqtyq monıtorıng nátıjeleri boıynsha zań jobasynda qoldanystaǵy zańnamanyń eskirgen jáne tájirıbelik máni joǵalǵan normalar alyp tastaldy, – dedi mınıstr.
Sonymen qatar Palata salyq salý máseleleri boıynsha depýtattyq túzetýlerdi birinshi oqylymda maquldady. Zań jobasyn depýtattar quqyqtyq normalardy «Ardagerler týraly» zań jobasyna sáıkes keltirý maqsatynda ázirledi. Qujatta UOS qatysýshylary men olarǵa teńestirilgen tulǵalardy kólik, múlik salyqtary, sottarda memlekettik baj tóleý, azamattyq hal aktilerin tirkeý kezinde jáne taǵy basqa salyqtardan, memlekettik bajdardan bosatý usynylady.
