Memleket basshysy Qasym-Jomart Toqaevtyń respýlıkalyq telearnalar arqyly tikeleı efırde jasaǵan málimdemesinen elimizdegi tótenshe jaǵdaı jáne ekonomıkalyq-áleýmettik saladaǵy daǵdarys qarsańynda qabyldanǵan is-sharalar josparyna qanyqtyq.
– Halqymyzda «Aýyryp em izdegenshe, aýyrmaıtyn jol izde» degen sóz bar. Eń aldymen, Prezıdenttiń qadaǵalaýymen koronavırýs indetiniń aldyn alý is-sharalarynyń ýaqytyly qolǵa alynǵanyn atap ótkim keledi. Elimizge jamanat habardyń alǵash jetken sátinen bastap shuǵyl túrde shekaradaǵy baqylaýdy kúsheıtý, qalalardy karantınge jabý, qoǵamdyq oryndardaǵy qozǵalysty shekteý sııaqty qadamdar der kezinde jasaldy. О́ıtkeni bizdiń eldi búkil el bolyp toılaıtyn úlken merekemiz Naýryz kútip turǵan edi. Bul kúnderi ejelden kele jatqan saltymyz boıynsha alqalaǵan aǵaıyn bir-birimen kórisip, tós qaǵystyryp, ulttyq merekemiz ulan-asyr toıǵa ulasyp jatatyn edi. Osy meıramymyzdy jyldaǵy dástúrimen, sán-saltanatymen atap ótetin bolsaq, aty jaman indettiń keń taralýyna múmkindik berip qoıar edik, – deıdi depýtat.
Záýresh Amanjolova ózi dáriger bolǵandyqtan, Memleket basshysynyń mindetti áleýmettik medısınalyq saqtandyrý júıesi boıynsha saqtandyrylmaǵan azamattardyń medısınalyq kómek alý quqyǵyn 1 sáýirden 1 shildege deıin uzartýdy tapsyrǵanyn óte quptarlyq is dep baǵalady.
Onyń aıtýynsha, MÁMS júıesin 2020 jyldyń 1 qańtarynan bastap engizý kerek bolǵan. Biraq bul úderisti birden engizý ońaı bolmaıtynyn eskerip, úsh aıǵa keıin shegergen edi. Endi is-shara qazirgi ahýalǵa baılanysty taǵy úsh aı toqtatylady. Iаǵnı, medısınalyq kómek azamattarǵa burynǵydaı qoljetimdi bolyp qala beredi. Sebebi atalǵan júıe qysyltaıań kezeńde qarapaıym jurttyń qaltasyna salmaq túsiredi. Búginde memleket 15 sanattaǵy azamattarǵa áleýmettik saqtandyrý paketin tólep berip otyr. Bulardyń jalpy úlesi – 10,5 mln adam.
– Sonymen qatar koronavırýstyń jer jahandy jaýlap, órship turǵan shaǵynda kún-tún demeı, aıaǵynan tik turyp qyzmet etip júrgen dárigerlerge Prezıdenttiń ózi bas bolyp jasalyp jatqan erekshe qamqorlyq pen halyqtyń qoldaýy óte mańyzdy. Medısına qyzmetkerleriniń aılyǵyna úsh aı boıy ústemaqy qosý týraly sheshimniń oryndy bolǵany anyq. Bastysy, birlimiz bekem bolyp, qabyldanǵan qaýipsizdik sharalaryn qatań saqtaıtyn bolsaq, adamzattyń basyna tóngen bul indettiń de betip qaıtaryp, eńseremiz dep senemin, – deıdi Záýresh Amanjolova.
