Osy jyly jergilikti dıqandar 88,2 myń gektar alqapqa kúrish seppek. Sondaı-aq 97,8 myń gektar dándi, 6 gektar maıly, 61,6 myń malazyqtyq, 17,7 myń gektar kartop, kókónis-baqsha egedi.
Egiske qajetti tuqym daıyndaý máselesi tolyq sheshimin tapqan. Qolda 22948 tonna joǵary reprodýksııaly kúrish tuqymy bar, bul kólem qajetti mólsherden asyp túsedi. Oǵan qosa 683 tonna jazdyq bıdaı, 94 tonna arpa, 17,6 tonna suly, 32,7 tonna júgeri, 10,1 tonna tary, 274,4 tonna jońyshqa, 95, 2 tonna maqsary jáne 37,7 tonna soıa tuqymy qambada tur.
– Byltyr Qarataý bókterine akvagel arqyly jazdyq bıdaı men maqsary ektik. «Pazylbek» sharýa qojalyǵy aýmaǵyna 80 gektar kúzdik bıdaı sebildi. Qazir sol bıdaıdyń shyǵymy jaqsy. Al bıyl mamandardyń zertteýinshe, oblys aýmaǵynda sý tapshy bolady. Byltyrǵymen salystyrǵanda bizge 1 mln tekshemetr sý az túsýi múmkin. Osyǵan baılanysty ártaraptandyrýǵa kóńil bólip, topyraqtaǵy tuzdy azaıtyp, mal azyǵyna jaraıtyn daqyldardy ekken jón, – deıdi Y.Jaqaev atyndaǵy Qazaq kúrish ǴZI dırektory Baqytjan Dúısembekov.
Oblysta ótken jyly sharýa qojalyqtary men ǴZI mamandary tájirıbe retinde 40 gektarǵa soıa egipti. Bastama óziniń tıimdiligin kórsetti. Osy jyly kórshi memleketterden suranys mol bolatyn daqyl kólemin 290 gektarǵa jetkizý josparlanyp otyr.
– Mamandar bizdiń óńirde kezdespeıtin qant qumaıyn da óndiristik synaqtan ótkizgen bolatyn. Sýarmaly jerdiń tuzdylyǵyn tómendetip, qunarly maz azyǵy sanalatyn osy daqyl kólemin bıyl 200 gektarǵa arttyramyz degen jospar bar. Keleshekte
3 myń gektarǵa jetkizý oılastyrylýda, – deıdi oblystyq aýyl sharýashylyǵy basqarmasy basshysynyń mindetin atqarýshy Seıilbek Nurymbetov.
Sortań jerdiń qunaryn arttyratyn qant qumaıy 1 gektar alqaptan 5-6 tonna tuzdy boıyna tartyp alady. Ári qunarly mal azyǵy bolyp esepteledi. Sonymen qatar osy jyly oblysta alma, júzim alqaptarynyń da kólemi artady.
Qyzylorda
