Týyndaǵan jaǵdaıǵa baılanysty qazir óńirde ınternet jyldamdyǵyn arttyrý nemese ınternet joq eldi mekenderge ınternet júrgizý úshin ınternet provaıderlermen kelissózder júrgizilýde. Jýyrda osy maqsatta oblys ákimi janynda jınalys ótkizilip, olarǵa naqty tapsyrmalar berildi. Nátıjesinde qashyqtyqtan oqytý úshin engizilgen elektrondy bilim berý platformalaryn paıdalaný kezinde ınternet trafık aqysyz, tegin júzege asyrylady.
Sonymen qatar ınternet joq eldi mekenderge ınternet tartý jumystary jedeldetildi. Ekinshi qıyndyq - Materıaldyq-tehnıkalyq qamtamasyz etý. Budan basqa, qashyqtyqtan oqytý úshin oqýshylar men muǵalimderge tehnıkalyq qurylǵylardyń (kompıýter, noýtbýk, planshet, uıaly telefon) jetkiliksizdigi máseleleri bar. Júrgizilgen monıtorıng nátıjesinde 6706 oqýshyǵa nemese jalpy oqýshy sanynyń 5% -na elektrondyq qurylǵylar jetispeıdi. Búgingi tańda, 1096 muǵalimge, 548 oqýshyǵa mektep kompıýterleri ýaqytsha paıdalanýǵa berildi. Bul jumys 6 sáýirge deıin jalǵasady. Máseleni sheshý úshin mektepter óz balanstaryndaǵy qurylǵylardy ýaqytsha paıdalanýǵa berdi. Budan basqa, 31 naýryzdan bastap «Biz qashyqtyqtan oqytýda qoldaý kórsetemiz» taqyrybynda aksııa bastadyq. Aksııa aıasynda jeke kásipkerler, mesenattar, túrli qorlar balalarǵa elektrondy qurylǵylardy syıǵa tartady.
Aksııa jarııalanǵan birinshi kúni Aqtaý qalasynda 2 balaǵa smartfon, 2 balaǵa teledıdar, Jańaózen qalasynda 3 balaǵa (2 planshet, 1 roýter), Qaraqııa aýdanynda 3 balaǵa smartfon, 10 balaǵa ınternet-tarıf, Munaıly aýdanynda 4 balaǵa 3 planshet, 1 smartfon, Túpqaraǵan aýdanynda 3 balaǵa smartfon, 1 oqýshyǵa teledıdar syıǵa tartyldy. Barlyǵy 18 bala. Aýdandyq, qalalyq bilim bólimderi janynan CALL ortalyqtary quryldy. Sebebi, oblys kóleminde 140 myńǵa jýyq oqýshy, 20 myńǵa jýyq kolledj stýdentteri men 15 myńǵa jýyq pedagogtarda qashyqtyqtan oqytý barysynda kóptegen suraqtar týyndaýda.
Sondaı-aq Qaraqııa aýdany, Aqqudyq ortalaý mektebiniń oqýshylary shtattyq rejımde mektepte oqytý múmkindikteri qaralýda. Sebebi ol mektepterde oqýshy sany az. Úshinshi másele - oqytý sapasy men mazmuny. Bul boıynsha 31 naýryzda Bilim jáne ǵylym mınıstriniń «Pandemııa kezeńinde bilim berý uıymdarynda, COVID-19 koronavırýstyq ınfeksııanyń taralýyna jol bermeý jónindegi sharalardy kúsheıtý týraly» №121 buıryǵy shyqty. Buıryqta balabaqshalar, mektepter, qosymsha bilim berý, arnaıy bilim berý, kolledjderde qashyqtyqtan oqytýdyń ádistemelik usynymdar berilgen.
Buıryqqa sáıkes mınıstrlik osy jumystardy 4 baǵytta uıymdastyrýdy josparlap otyr. Onyń birinshisi, «EL ARNA», «balapan» telearnalary arqyly qazaq jáne orys tilderinde translıasııalar jiberý. Bul sabaqtar kúnine 8 saǵatty qatıtyn túsilimderden turady, jalpy tórtinshi toqsanǵa 3300 saǵattyq túsirilimder ázirlenedi. Ekinshi baǵyt bul «Qazaq radıosy» arnasy arqyly keste boıynsha sabaqtar júrgizý.Úshinshi, shalǵaı eldi mekenderde oqý materıaldarynyń siltemeleri bilim alýshynyń mekenjaıyna jaqyn ornalasqan «Qazposhta» bólimine joldanady. Al tórtinshi baǵyt jáne negizgi baǵyt bul arnaıy ázirlengen ınternet platformalar. Bul maqsatta qazirgi kezde sıfrlyq resýrstarda sabaqtar ázirlendi. Endi ustazdardyń osy platformalarmen jumys jasaýy mańyzdy. Daıyndyq jumystaryn synap kórý úshin 1 sáýirden synama sabaqtar bastalady. Muǵalimder ózderiniń sabaqtaryn qalaı qosylatynyn tekseretin bolady.
2 sáýirde elektrondyq platformalarda ata-analar jınalystary bolady. Ol jerde ata-analarǵa balalarmen jumysty qalaı uıymdastyrý men qalaı sabaqtarǵa qosylý kerektigi túsindiriledi. 3 sáýir kúni synyp saǵattary júrgiziledi, bul jerde de qashyqtyqtan sabaq oqýdyń erekshelikteri túsindiriledi. 6 sáýirge tolyq daıyn bolý úshin bilim berý salasynda kórsetilgen baǵytta jumystar atqarylýda.
