Oblys ortalyǵyn dezınfeksııalaý jumystary osydan bir apta buryn bastaldy. Osy ýaqyt ishinde nebary aınaldyrǵan 8 kóshe men 40-tan astam aıaldamaǵa sanıtarlyq tazartý jumystary júrgizilipti.
–7-shi kún boldy. Dıhlorınmen tazartý júrgizilýde. Aıaldamalar, jol jıegi, qoqys jáshiginiń mańaıy, adamdar kóp jınalatyn qoǵamdyq oryndar dezınfeksııalanyp jatyr, – deıdi «Tazalyq» kommýnaldyq kásipornynyń jumysshysy Anatolıı Vyhovskıı.
Ortalyq saıabaq, kósheler, oıyn alańqaılary, jaıaý júrginshiler joly men qoqys jáshikteriniń tóńiregi de basty nazarda. Al, bar qalany qamtý ońaı-ospaq sharýa emes. Kúsh jetpeı me, álde ynta joq pa? Áıtpese, koronavırýstyń qanshalyqty qaýipti dert ekendigin sanamyzǵa sińire almaı otyrmyz ba?!
– Biz eki mashınanyń kólemin alamyz. 10 tekshe metr sýǵa 2 quty eritindi qosamyz. Aıaldamalarǵa aıryqsha nazar aýdarylyp otyr. Qala ishinde jolaýshylardy tasymaldaý áli toqtatylǵan joq. Bul is bir-eki adamnyń, bir-eki tehnıkanyń kúshimen aqtarylatyn sharýa emes, – deıdi qalalyq turǵyn úı-kommýnaldyq sharýashylyǵy bóliminiń sektor meńgerýshisi Marat Aıjaryqov.
Oblys ortalyǵyn dezınfeksııalaýǵa «Tazalyq» kommýnaldyq kásipornynan eki tehnıka men eki jumysshy jumyldyrylǵan. Bar bolǵany osy.
