Oblystyq kásipkerlik jáne ónerkásip, aýyl sharýashylyǵy basqarmalary men aýdan ákimdikteri oblystyń azyq-túlik qaýipsizdigin qamtamasyz etý jáne áleýmettik mańyzy bar azyq-túlik taýarlary baǵasynyń ósýin tejeý sharalaryn qolǵa alǵan bolatyn. Basqarma basshysynyń aıtýynsha, tótenshe jaǵdaı kezinde engizilgen karantın barysynda azyq-túlik saýdasynyń barlyq nysandary tolyq rejımde jumys isteıdi, taýarlar defısıti joq. Keıbir taýarlarǵa defısıt týyndaǵan jaǵdaıda óńirlik turaqtandyrý qory, sondaı-aq, qajet bolǵanda memlekettik materıaldyq rezervi iske qosylady.
–Oblysta áleýmettik mańyzy bar azyq-túlik taýarlarynyń qory jetkilikti. Búgingi kúni ol 46,3 myń tonnany, onyń ishinde kásiporyndarda 35755,1 tonna, qoımalarda 2094 tonna, saýda nysandarynda 6494 tonna, turaqtandyrý qorynda 1994,7 tonnany quraıdy.Bul taýarlar 50 kúnge jetedi. Oblysta kún saıyn 300 tonna sút ónimi, 77 tonna iri qara eti, 123 tonna qus eti, 2,2 mıllıon dana jumyrtqa, 1000 tonna un jáne ózge de taýarlar óndiriledi. Kartop, sábiz, pııaz tárizdi kókónis ónimderi 100 tonnaǵa deıin tasymaldanady. «Esil» áleýmettik-kásipkerlik korporasııasynyń turaqtandyrý qorynda 1995 tonna áleýmettik mańyzy bar azyq-túlik taýarlary bar. Taǵamdar ortalyq bazardaǵy «Qamqor» kommýnaldyq pavılony arqyly satylady. Sondaı-aq, óńirlik turaqtandyrý qoryn molaıtý maqsatynda qosymsha ónimder satyp alynýda. Bul maqsatqa jergilikti bıýdjetten 750 mıllıon teńge bólindi,–dedi basqarma basshysy.
Oblystyq kásipkerlik jáne ónerkásip basqarmasy aýdan, qala ákimdikterimen, óńirlik kásipkerlik palatasymen, oblystyq básekelestikti qorǵaý jáne damytý departamentimen birge azyq-túlik ónimderi baǵasyna kún saıyn monıtorıng júrgizedi. Baǵany uıymdasqan túrde kóterýge jol bermeý maqsatynda vedomstvoaralyq birlese jumys isteý nyǵaıtyldy. Búgingi kúni áleýmettik mańyzy bar azyq-túlik taýarlarynyń baǵasy negizinen, turaqty. Tótenshe jaǵdaı engizilgen kezden beri kartop pen qanttyń baǵasy kóterilgeni baıqalady. Sondyqtan, baǵa turaqtylyǵyn qamtamasyz etý maqsatynda Qazaqstan Respýblıkasy Úkimetinińqaýlysymen el ekonomıkasy men turǵyndardyń turmys qajettilikterin úzilissiz qamtamasyz etý úshin azyq-túlik jáne ózge de taýarlardyń shekteýli baǵasyn belgileý tártibi bekitilgen.
–Úkimet áleýmettik mańyzy bar azyq-túlik taýarlarynyń tizimin bekitti. Oǵan un, nan, kúrish, makaron, et, sút ónimderi, kúnbaǵys maıy jáne ózge de taýarlar tárizdi 19 taýar kiredi. Qoldanystaǵy zańnamaǵa sáıkes, memlekettik komıssııada áleýmettik mańyzy bar azyq-túlik taýarlarynyń 9 túriniń shekteýli baǵasyn engizý máselesi qaraldy. 2020 jyly taýarlardyń shekteýli bólshekti baǵasy 10 paıyzdan aspaýy tıis. Saýda jáne ıntegrasııa mınıstrligi taýarlar tizimin engizý jáne olarǵa úsh jumys kúniniń ishinde shekteýli bólshekti baǵa belgileý boıynsha ortalyq jáne jergilikti atqarýshy organdardyń usynysyn qaraýda.Ázir shekteýli baǵa bekitilgen joq. Ol bekitilgennen keıin BAQ-da jarııalanyp, saýdamen aınalysatyn sýbektilerge jetkiziledi. Onyń saqtalýyna bizdiń basqarma, qala men aýdan ákimdikteri memlekettik baqylaý ornatady,–dedi oblystyq kásipkerlik jáne ónerkásip basqarmasynyń basshysy Erbol Ospanov.
Bul árıne, quptaýǵa turarlyq. Shekteýli baǵa belgilenip, qatań qadaǵalanyp otyrǵanda ǵana qazirgi kúrdeli jaǵdaıdy bas paıdalaryna jaratyp qalǵysy kelgen saýda salasyndaǵylardyń degeni bolmaıdy.
