«Aqtaý-Kókshetaý» reısimen kelgen barlyq azamattar aldymen mynadaı saýalnama paraǵyn toltyrdy. Munda azamattyń aty-jóni, mekenjaıy tárizdi aqparattar jazylady. Bul ushyp kelgender arasynda indet anyqtalsa, olardy tez arada izdestirýge baǵyttalǵan shara qabyldanady. Sondaı-aq, saýalnamadaǵy basty suraq sońǵy 14 kún ishinde qandaı elderde bolǵandyǵy. Eger, jolaýshy 1A kategorııaly elderge barǵanyn rastasa, 14 kún karantınge jatqyzylady. Al, ózgeB sanattaǵy elderden kelgen azamattar eki aptada úı karantıninen ótýi tıis.
–Vokzaldar men áýejaılarda otbasymen, jas balalarmen saparlap júrgen adamdardy áli de kezdestiremiz. Bul úlken qater. Sondyqtan, jaǵdaıdy jalpy jurtqa áli de túsindirýge týra keledi,–deıdi oblystyq kóliktegi taýarlar men kórsetiletin qyzmettiń sapasy men qaýipsizdigin baqylaý basqarmasynyń jetekshi mamany Svetlana Shapovalenko.
Áýejaı qyzmetkerleri kóliktegi qyzmet pen qaýipsizdikke jaýapty epıdemıologtarmen kúsh biriktirgen. Mamandar qashyqtan dene qyzýyn ólsheý qurylǵylary, juqpaly indetten qorǵaný kostıýmderimen qamtamasyz etilgen.
Karantın bastalǵaly oblys ortalyǵyndaǵy áýe tasymaly barynsha shekteldi. Mamandar basty jaýapkershilik qarapaıym turǵyndarda ekendigin eskertedi. Tótenshe jaǵdaı rejıminde qandaı da bir saparǵa shyǵýdan bas tartý asa mańyzdy.
