Aqkól qus fabrıkasynda 100-den astam adam eńbek etedi. 2014 jyly óz jumysyn bastaǵan kásiporynǵa 2 jarym mlrd teńge kóleminde ınvestısııa tartylǵan. Áýel basta 5 mln dana jumyrtqa óndirgen kásiporyn qazir óndiris qýatyn 70 mıllıonǵa jetkizgen. Fabrıkanyń óńirdegi azyq-túlik qaýipsizdigin qamtamasyz etýde mańyzy zor.
–Qazir qus sany 180 myńǵa jýyq. Balapan qorasynda 90 myńǵa jýyq qus ósirilýde. Táýligine 170-160 myńǵa jýyq jumyrtqa jınaımyz,–deıdi «Úshbulaq-2005» qus fabrıkasy dırektorynyń orynbasary Súndet Asqarov.
Mamandar san qýyp, sapany nazardan tys qaldyrmaq emes. Munda qus azyǵy tek tabıǵı jem-shópten daıyndalady. Qazirgi kúni Aqkóldiń bul ónimine shet elderden suranys mol.
–Álemde azyq-túlikke alańdaýshylyq paıda boldy. Bizdiń elimizde buǵan eshqandaı negiz joq. Qoldan kelgenshe óńir turǵyndaryna qoldaý tanytamyz. Aqkól qalasyna 10 myń dana jumyrtqa jáne Kókshetaý qalasyna 34 myń dana jumyrtqa qus fabrıkasynyń atynan kópbalaly analar jáne zeınetkerlerge, jaǵdaıy joq otbasylarǵa kómek retinde jiberip otyrmyz,–deıdi «Úshbulaq-2005» qus fabrıkasynyń dırektory Saparǵalı Ábdiraıymov.
Jumyrtqa áleýmettik mańyzy bar 19 azyq-túliktiń biri. Astyq naryǵyndaǵy baǵanyńturaqsyzdyǵyna baılanysty jumyrtqanyń ózindik quny ózgerip turady. Kásiporyn qazir joǵary sapaly taýyq jumyrtqasynyń bir danasyn 24-26teńgemen saýdalaýda. Áleýmettik jaýapkershiligin jete sezingen kásiporynǵa memleket tarapynan qoldaý da kórsetilip otyr.
–«Úshbulaq-2005» jaýapkershiligi shekteýli seriktestigi bıznesti qoldaýdyń jol kartasyna» engen. Baǵdarlama aıasynda kásiporynǵa elektr qýaty men aýyz sý tartyldy, jol tóseldi. Qus fabrıkasy árqashan áleýmettik jaýapkershilik tanytyp keledi. Elorda men oblys jármeńkelerinde turǵyndarǵa arzandatylǵan baǵamen jumyrtqa usynýda. Áleýmettik az qamtylǵan azamattarǵa turaqty qoldaý kórsetedi,–deıdi aýdandyq aýyl sharýashylyǵy bólimi basshysynyń orynbasary Valentına Sıtnıkova.
Buǵan deıin otandyq qus fabrıkalary óz óniminiń 50 prosentin eksportqa shyǵaryp kelgen. Qazir basymdyq, ishki naryqqa berilmek.
Aqkól aýdany,
Aqmola oblysy.
