«Ardagerler týraly» Zań jobasynda áleýmettik qoldaý sharalarymen qamtylatyn ardagerler sanatyna basqa memleketterdiń aýmaqtarynda bolǵan urys qımyldaryna qatysýshylardy qosý kózdelgen. Osyǵan oraı Parlament Májilisiniń depýtaty Káribaı Musyrman bir top depýtattyń bastamashylyǵymen «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister engizý týraly» Qazaqstan Respýblıkasy Zańynyń jobasy ázirlenin málimdedi.
Bul zań jobasy boıynsha aldaǵy ýaqytta Uly Otan soǵysyna qatysýshylar men olarǵa teńestirilgen adamdarmen qatar, basqa memleketterdiń aýmaqtaryndaǵy urys qımyldarynyń ardagerlerin de salyqtar men memlekettik bajdan bosatý usynylyp otyr. Atap aıtqanda, kólik salyǵynan, múlik salyǵynan, sottarda memlekettik baj tóleýden, azamattyq hal aktilerin tirkeý kezinde tóleýden, notarıattyq is-áreketter jasaý kezinde bajdan, ózge de áreketter jasaǵan kezde memlekettik baj tóleýden bosatý, sondaı-aq kúntizbelik jyl úshin 882 aılyq eseptik kórsetkish mólsherindegi standartty shegerimdi qoldaný qarastyrylady.
Usynylyp otyrǵan normalar Tájik-Aýǵan ýchaskesinde jaýyngerlik mindet atqarǵan Qazaqstan Respýblıkasynyń áskerı qyzmetshilerin; 1968 jyly Chehoslovakııadaǵy janjaldy retteýge qatysqan áskerı qyzmetshilerdi, sondaı-aq ishki ister jáne memlekettik qaýipsizdik organdarynyń basshy jáne qatardaǵy quramynyń adamdaryn; Iraktaǵy halyqaralyq bitimgershilik operasııalaryna bitimgershi retinde qatysqan Qazaqstan Respýblıkasynyń áskerı qyzmetshilerin; Taýly Qarabaqtaǵy etnosaralyq janjaldy retteýge qatysqan áskerı qyzmetshilerdi, sondaı-aq ishki ister jáne memlekettik qaýipsizdik organdarynyń basshy jáne qatardaǵy quramdarynda bolǵan adamdardy qosymsha áleýmettik jeńildiktermen qamtamasyz etýge baǵyttalǵan.
