Áýege kóterilgen toptyń quramynda Ishki mınıstriniń orynbasary Iýrıı Ilınmen birge IIM Tótenshe jaǵdaılar komıteti tóraǵasynyń orynbasary Barat Duzaqbaev, Aqmola oblysy ákiminiń orynbasary Asqar Muratuly jáne Aqmola oblysy Tótenshe jaǵdaılar departamentiniń bastyǵy Alekseı Sovetov boldy.
Olar Arshaly, Selınograd, Atbasar, Astrahan aýdandarynyń aýmaǵyn baqylady, sondaı-aq Nura, Esil, Kolýton, Jabaı, Shaǵalaly ózenderiniń arnasy men Astana, Besýat, Shaǵalaly sý qoımalaryn, Astana kontrrettegishin, Preobrajen sý torabyn, Dımandy sýarý júıesin, Aıdabol bógetin tekserip kórdi.
«Aqmola oblysynda biz Nur-Sultan qalasynan Atbasar qalasyna deıingi sý tasqynynyń qaýpin baqylap kórdik. Búgingi tańda jaǵdaı turaqty. О́zenderdiń basym bóligi muz astynda jatyr. Sonymen qatar osy aptada aýa temperatýrasy kóterilip, muz qarqyndy erıdi. Jalpy Atbasar, Talapker jáne basqa da eldimekender boıynsha qazirgi ýaqytta sý basý qaýpi joq dep aıtýǵa bolady. Aqmola oblysynyń TJD kúshteri men quraldary karantındik rejımdegi Talapker jáne Jibek joly eldi mekenderine baǵyttalyp otyr. Sonymen qatar ońtústik óńirlerden qosymsha kúshterdi tartý josparda bar. Apta sońynda sheshim qabyldaımyz», dedi Iýrıı Ilın.
Atbasar, Selınograd, Astrahan jáne Arshaly aýdandarynda sý tasqynyna qarsy jumystarǵa 150-den asa adam, 62 birlik tehnıka men 15 motopompa jumyldyryldy. Jaǵdaı kúrdelenip jatsa, qosymsha 2 500-den asa adam jáne 1000-nan asa tehnıka daıyn tur.
