«Kómek suraǵan 12,5 myń kásipkerdiń 60%-y koronavırýspen kúres jáne qyzmetti shekteý boıynsha sharalar saldaryn sezindi. «Qazaqstan Respýblıkasynda tótenshe jaǵdaı engizý týraly» Jarlyǵyna sáıkes, memleket bıznesti qashyqtyqtan jumys isteýge aýystyryp, kóp kásiporyn ýaqytsha jabyldy. Memleket shaǵyn jáne orta kásipkerlikti qoldaý boıynsha sharalardy qabyldady. Memlekettik jáne qalalyq bılikten múlikti jalǵa alǵandar tólemdi 3 aı keıinge shegerý múmkindigin ıelendi.
Jalǵa berýshiler men jalǵa alýshylar arasyndaǵy qarym-qatynas azamattyq-quqyqtyq qatynasqa jatatyndyqtan ol Azamattyq kodekstiń «Mindettemeniń buzylǵandyǵy úshin jaýapkershilik negizderi» 359-babymen retteletinin aıta keteıik. Palatanyń óńirlik ókilderi kommersııalyq jyljymaıtyn múlikti jalǵa alý boıynsha daýlardy medıasııalyq jolmen sheshýge kiristi. Mamandar nysandary karantınge jabylǵan 484 orynjaı ıesimen baılanysqa shyǵyp, olarǵa 15 myń jalǵa alýshy habarlasqanyn anyqtady. Ázirge 48%-y (236 nysan) jeńildik jasaýǵa daıyn jáne túrli shart negizinde kelisim jasaýda. Almatyda kásipkerlerdiń bir bóligi tólemdi kommýnaldyq qyzmet jáne kúzet qyzmetine ǵana alýǵa kelisti. Qostanaıda jalǵa berýshiler jalǵa alý qunyn jáne marketıngtik tólemderdi qaryzdy keıinge qaldyrmaı toqtatty. Atyraý oblysy jáne Shyǵys Qazaqstan oblysynyń jalǵa alýshylary jekelegen negizde obektilerdiń ıelerimen somany azaıtý nemese jaldaý merzimin keıinge qaldyrý týraly kelise alady. Qaraǵandy jáne Mańǵystaý oblystarynyń jalǵa berýshileri jalǵa berý kelisimshartynda qarastyrlǵan aıyppuldyq sanksııalardy alyp tastaýǵa jáne jumys kestesi boıynsha jalǵa alý qunyn qaıta esepteýge kelisti. Sondaı-aq óńirge qaraı kásipkerlerde 20-50% kóleminde jeńildik alýǵa múmkindik bar»,- delingen jarııalanǵan aqparatta.
Saýaldama nátıjesi kórsetkendeı, jalǵa berýshiler memleket tarapynan kommýnaldyq tólemder men qaryzdardy keıinge shegerý, sol sekildi 2020 jyly korporatıvti tabys salyǵynan bosatý boıynsha qoldaý kórsetilse, jeńildik jasaýǵa daıyn ekenderin bildirtken. Kóptegen nysan jarııalanǵan múlik salyǵyn tóleýden bosatylmapty. О́ıtkeni, olar iri saýda nysany (aýdany 2000 sharshy metrden kem), saýda oıyn-saýyq ortalyǵy nemese kórme oryndaryna jatpaıdy. Jalǵa berýshiler kásipkerlerge jeńildik berýge nege qulyqsyz? Osy oraıda «Atameken» UKP Úkimetke jalǵa berýshilerdi 2020 jylǵy múlik salyǵynan bosatýdy nemese nysan ıeleri kásipkerlerdi tólemnen bosatsa olarǵa kommýnaldyq tólemderdi keıinge shegerý múmkindigin berýdi usyndy.
«Prezıdent jəne Úkimet qoldaýdyń alǵashqy paketin shaǵyn jáne orta bızneske baǵyttady. Alaıda «Atamekenge» basqa da salalarda qıyn jaǵdaı týraly ótinimder túsýde. Birinshi kezekte bul óńdeý ónerkásibi, agroónerkásip kesheni, qurylys, logıstıka, sondaı-aq qyzmet kórsetý jáne týrızm salasyndaǵy iri bıznes te qoldaýsyz qalyp otyr. Ulttyq palata kásipkerlerdiń túıtkildi máselelerin jınaqtap, basqa salalardaǵy kásipkerlerden saýaldama suraqtaryna jaýap berýdi suraıdy»,- dep túıindeldi.
