Qazaqstan Respýblıkasy Prezıdenti Ákimshiliginiń kelisimi boıynsha oblys ákiminiń ókimimen Súleımenov Serik Júsipuly oblys ákiminiń orynbasary laýazymyna taǵaıyndalyp otyr. Ol qurylys, energetıka, turǵyn úı jáne kóliktik ınfraqurylymdy damytý salalaryna jetekshilik etetin bolady.
Búginnen bastap oblys ákiminiń ishki saıasat, jastar máselesi, mádenıet pen sport jáne jumyldyrý daıyndyǵy salalaryna jetekshilik orynbasary qyzmetine Ahmet Serik Ábjáliuly taǵaıyndaldy. Qazaqstan Respýblıkasy Prezıdenti Ákimshiliginiń kelisimi boıynsha oblys ákiminiń ókimimen osy qyzmetke taǵaıyndalǵan Serik Ábjáliulyna oblys ákimdigi men quqyq qorǵaý organdary arasyndaǵy ózara is-qımyldy júzege asyrý, oblystaǵy qalyptasqan tótenshe jaǵdaılardaǵy jumystardy úılestirý de júktelip otyr.
Sondaı-aq, oblys ákiminiń orynbasary Jahanov Baqyt Dúısenuly aýyl sharýashylyǵy, jer qatynastary, tabıǵat paıdalanýdy retteý, veterınarııa, ındýstrıaldy-ınnovasııalyq damý, kásipkerlik jáne týrızmdi damytý salalaryna jaýapty bolady.
Al oblys ákiminiń orynbasary Baıqadamov Naýryzbaı Seıitqalıuly bilim, densaýlyq, jumyspen qamtý jáne eńbek salasyndaǵy baqylaý salalaryna jetekshilik etedi.
Otyrysta Memleket basshysynyń jumyssyz jastarǵa «Jumyspen qamtýdyń jol kartasy» baǵdarlamasy aıasynda tıisti jalaqy tóleı otyryp, olardy sý tasqynyna qarsy is-qımyldarǵa, kóktemgi eginge, qurylysqa jáne basqa da jumystarǵa tartý týraly tapsyrmasynyń aımaqta oryndalý barysy baıandaldy. Bul baǵyt boıynsha óńirge 37 mlrd. teńge qarjy bólinýde. Atqarylatyn sharalar týrasynda oblys ákimniń orynbasary Baqyt Jahanov baıandady.
Sonymen qatar, jıynda aımaqta kornavırýs indetimen kúres, azyq-túlik baǵalary jáne jergilikti jerdegi qoǵamdyq-saıası ahýal talqylandy. Jaýapty sala basshylary, Qyzylorda qalasy men aýdan ákimderi aımaq basshysyna atqarylǵan jumystar týraly esep berdi.
