Ishki ister mınıstriniń tapsyrmasy boıynsha qylmystyq-atqarý mekemeleriniń barlyq tigin sehynda qyzmetkerlerge arnalǵan qorǵanys quraldaryn daıyndaý qolǵa alyndy. Birinshi kezeńde medısınalyq maskalardy tigý óndirisi jolǵa qoıylyp, 1 mıllıonǵa jýyq betperde daıyndaldy. Bul jeke quramnyń qorǵanys quraldaryna degen qajettilikterin tolyǵymen jabýǵa múmkindik berdi.
Sonymen qatar polısııa qyzmetkerlerine arnalǵan arnaıy kostıýmder óndirisi bastaldy. Birneshe ret qoldanýǵa jaraıtyn qorǵanysh kombınezony sý ótkizbeıtin qospasy bar matadan jasalǵan. Buıymdardyń bul jańa túri – ınfeksııa juqtyrýdan qorǵanýdyń qosymsha quraly.
160 qorǵanys kombınezonynan turatyn birinshi partııany blok-bekette qyzmet atqaratyn elordalyq polıseıler aldy.
Jaqyn arada qorǵanys kombınezondarymen IIM-niń barlyq aımaqtyq bólimsheleri qamtamasyz etiledi. Eń aldymen karantındik is-sharalarǵa tartylǵan qyzmetkerler alady.
– Kún saıyn 25 myńǵa jýyq polıseı, qutqarýshylar jáne Ulttyq ulannyń áskerı qyzmetshileri jasaqpen kúzetke shyǵady. Osy qıyn jaǵdaılarda penıtensıarlyq júıe óziniń tıimdiligin kórsetti. Meniń tapsyrmam boıynsha Qylmystyq-atqarý júıesi komıtetiniń «Eńbek» RMK ázirlegen quraldar tótenshe jaǵdaı kezinde óz qyzmettik boryshyn táýlik boıy oryndaıtyn qyzmetkerlerimizdiń densaýlyǵyn qorǵaýdy qamtamasyz etýge múmkindik beredi, – dedi Ishki ister mınıstri Erlan Turǵymbaev.
Buǵan qosa, QAJK basshylyǵy «dezınfeksııalyq tonnel» dep atalatyn qorǵanys quralyn tanystyrdy. Birinshi eksperımenttik úlgi Ishki ister mınıstrliginiń ǵımaratyna kire beriste ornatylǵan. Tonnel qurylymy qarapaıym, dezınfeksııalyq qasıeti bar arnaıy fızertindini búrký quralymen jabdyqtalǵan. Mundaı pýnktter QAJ mekemelerinde koronavırýstyq ınfeksııanyń taralýynyń aldyn alý maqsatynda barlyq kolonııalarda ornatylady.
