Jasyratyny joq, qazir jahantorǵa kirýge de qorqatyn boldyq. Kirseńiz, myna álemdi jaılaǵan dert týraly aqparat tasqynynan qaradaı qarap júregińiz shaılyǵady. Sondaı kezde kóńilge dem beretin, oıyńyzdy bir sát ońashaǵa jetelep áketetin basqa bir dúnıe izdeısiz.
Keshe áleýmettik jeliden oblystyq Densaýlyq saqtaý basqarmasy basshysy Ilııas Muhamedjannyń myna bir postyn oqyp, «Tórtkúl dúnıeni alańdatqan indetke qarsy turýǵa da bolady eken-aý» degen úmit oty paıda bolǵany ras.
«Búgingi kúni bizdiń oblysta 6 adamnan koronavırýs ınfeksııasy anyqtalǵany belgili. Qazir Semeı men О́skemen dárigerleri kún-tún demeı, úılerine barmastan olardy emdeýge bar kúsh-jigerlerin salyp jatyr. Bir qýanyshtysy, 6 sáýir kúni 28 naýryzdan beri aýrýxanada jatqan 1959 jylǵy semeılik er azamattyń jaǵdaıynyń birshama jaqsarǵany baıqaldy. Ol kisi alǵash aýrýhanaǵa túskende ózdiginen dem ala almaı, ókpesi jasandy jeldetý apparatyna qosylǵan bolatyn. Qazir ókpesinen jasandy jeldetý qurylǵysy alynyp, ózdiginen demalyp jatyr. Bul – Semeı men О́skemen qalasynyń dárigerleriniń, onyń ishinde reanımatologtar men anestezıologtardyń jankeshti eńbeginiń nátıjesi. Eshkimdi de bóle jarǵym kelmeıdi. Barlyǵy judyryqtaı jumylyp, buǵan deıin óńirdiń emhanalaryna satyp alynǵan zamanaýı tehnologııalar kómegimen naýqastardy emdep jatyr» dep jazypty basqarma basshysy óziniń feısbýktegi paraqshasynda.
Aty jaman indetpen kúresip jatqan dárigerlerdiń úılerine barmaı, emhanaǵa qonyp, jumys istep jatqany belgili.
Osy oraıda erekshe atap óter dúnıe, bastaryn qaýip-qaterge tigip eńbek etip júrgen dárigerler men olardyń jaqyndaryna ózge aýrýhanalarda jumys isteıtin áriptesteri de kómek qolyn sozyp, biri jemis-jıdek, endi biri qazy-qarta, qymyz ákelip, qoldaý bildirip jatqan kórinedi. Al úılerine barmaı jumys istep jatqan dárigerler ózderi eńbek etetin emhanadaǵy arnaıy bólmede kezekshilikten tys ýaqytta kóńilderin sergitip, jattyǵýlar jasap, sportpen shuǵyldanady eken.
Shyǵys Qazaqstan oblysy
Sýretter I.Muhamedjannyń feısbýktegi paraqshasynan alyndy
