«Talıban» ókili Sýhaıl Shahınniń aıtýynsha, uıymnyń arnaıy toby aldaǵy kelissózderge qatyspaıdy. Munyń sebebin Aýǵanstan úkimetiniń tutqyndardy bosatýǵa yqylasy joq ekenimen túsindiredi.
«Bizdiń arnaıy tobymyz erteńnen bastap tıisti taraptarmen bolatyn nátıjesiz kezdesýge qatyspaıdy», dep jazdy S.Shahın týıtterdegi paraqshasyna.
Esterińizde bolsa, bıylǵy aqpanda AQSh pen «Talıban» qozǵalysy ózara mámilege kelip, birqatar mindetter alǵan-tuǵyn. Soǵan sáıkes, Aýǵanstan úkimeti 5 myńǵa jýyq «Talıban» uıymynyń múshesin, al qarýly top tarapy 1000 adamdy bosatýy tıis bolatyn.
Sonymen qatar kelisimde AQSh-tyń jáne halyqaralyq qarýly kúshterdiń Aýǵanstan aýmaǵynan shyǵarylatyny aıtylǵan-dy. Munyń ótemi retinde «Talıban» óńirdegi qaýipsizdikti qamtamasyz etýi tıis. Bul qujat 18 jylǵa sozylǵan soǵystyń aıaqtalýǵa taıap qalǵanyn baıqatqandaı kóringen. Áıtse de, ekijaqty kelisimge qarama-qaıshy keletin máseleler áli de óte kóp eken.
Tutqyndardy almasý taraptardyń bir-birine degen senimin kúsheıtip, kelisimge adal ekenin kórsetýge tıis edi. Osylaısha, «Talıban» uıymynyń ókilderi men Aýǵanstan úkimetiniń músheleri ótken aptada Kabýlda kezdesken bolatyn.
Osy oraıda, Aýǵanstan úkimetiniń de óz aıtary bar. Ulttyq qaýipsizdik keńesiniń baspasóz hatshysy Djavıd Faısaldyń sózine qaraǵanda, «Talıban» tarapy kelisimdi paıdalanyp, býynsyz jerden pyshaq uryp otyrǵan kórinedi.
Al el úkimeti tarapynan kelissózderge qatysyp júrgen Matın Bektiń aıtýynsha, «Talıban» uıymy tutqyndaǵy 15 komandırin bosatýdy suraǵan. Olardyń bári qozǵalystyń beldi múshesi sanalady.
«Biz azamattarymyzdy óltirgenderdi bosata almaımyz. Olardyń qaıtadan maıdanǵa oralyp, qandy qyrǵyn salýyna múmkindik bermeımiz», dedi M.Bek jýrnalıstermen ótken baspasóz jıynynda. Onyń keltirgen derekterine saı, Aýǵanstan úkimeti 400-ge jýyq «Talıban» múshesin bosatýǵa ázir. Bıliktiń pikirinshe, olardan keletin qaýip az. Sonymen qatar jasy 50-den asqan, densaýlyǵy syr bergen 100 múshesin de bostandyqqa shyǵarmaq. Biraq «Talıban» bul usynysty qabyldamaı otyr.
Osy oraıda aıta ketken jón. Qazaqstan Aýǵanstandaǵy ahýaldy jaqsartyp, óńirde turaqtylyq pen beıbitshilik ornatýǵa múddeli. Eki el arasyndaǵy yntymaqtastyq jolǵa qoıylǵan. Qazaqstan aýǵan stýdentteriniń bilim alýyna kómektesip keledi.
Sondaı-aq 2017-2018 jyldary BUU Qaýipsizdik Keńesine turaqty emes múshe bolyp saılanǵan kezde de Qazaqstan tarapy Aýǵanstan máselesin esten shyǵarǵan joq. Máselen, Aýǵanstan/Talıban komıtetine, ILIM/Ál-Kaıda komıtetine jáne Somalı/Erıtreıa Sanksııalyq komıtetine tóraǵalyq etý tapsyrylyp, elimiz atalǵan mindetti abyroımen atqaryp shyqty.
Qazaqstan tarapy Ortalyq Azııa jáne Aýǵanstandy beıbitshilik, yntymaqtastyq jáne qaýipsizdiktiń úlgisine aınaldyrýdy kózdeıdi ári osy maqsatta jumys istep keledi.
