Kollajdy jasaǵan Qonysbaı Shejimbaı, EQ
Jańa syn-tegeýrinderge durys baǵa bere almaǵan elderdiń kóshbasshylary qazir ondaǵan myń adamnyń ómirimen ólshenetin óz qatelikteriniń zardabyn tartýda. Qazaqstanda qaterli indettiń aldyn alý sharalary der kezinde shuǵyl qolǵa alynýymen qatar, elimizde qalyptasqan ekonomıkalyq, áleýmettik ornyqtylyqtyń qomaqty qory arqasynda apattyq jaǵdaı oryn alǵan joq.
Qazaqstan Respýblıkasynyń Tuńǵysh Prezıdenti – Elbasy N.Á.Nazarbaev óziniń saıası kóshbasshylyǵy jyldarynda elimizdiń ekonomıkalyq jáne áleýmettik áleýetin dáıekti túrde arttyrdy, Qazaqstan halqy Assambleıasynyń Tóraǵasy retinde «qaýipsizdik beldeýin» – halqymyzdyń birligi men yntymaǵyn nyǵaıtty. Qazaqstan Respýblıkasynyń Ulttyq qory qurylǵan kezde ártúrli qoǵam jáne saıası qaıratkerler tarapynan qanshama syn men narazylyq bolǵany barlyǵymyzǵa belgili. Sol kezde ózderin halyq ıgiliginiń qamqorshylary retinde kórsete otyryp, olar «barlyǵyn taratyp berýge» shaqyrdy. Eger bul «sharık» tásili sol kezde iske asyrylsa, onda búginde el ulttyq apattyń aldynda bolar edi.
Elbasy Táýelsizdik jyldary elimizdiń áleýmettik ınfraqurylymyn arttyrýǵa erekshe kóńil bóldi – «100 mektep – 100 aýrýhana», «Salamatty Qazaqstan» baǵdarlamalary elimizge zamanaýı medısınalyq ınfraqurylym, ozyq jabdyqtalǵan ǵylymı-medısınalyq ortalyqtar, búginde koronavırýs pandemııasyna laıyqty jaýap bere alatyn joǵary kásibı kadrlar tárbıeledi.
Sonymen qatar kez kelgen daǵdarystyq jaǵdaıda abyrjymaı, alańdamaı, jańa múmkindikter izdegen jón. «Daǵdarys – bul jańa múmkindikter» – osyndaı qaǵıdatty Elbasy N.Á.Nazarbaev kúrdeli jaǵdaılarda árdaıym basshylyqqa aldy jáne ol óziniń oń jemisin berdi.
Búgingi tańda aıtarlyqtaı óndiristik áleýet quryldy, ár jańa daǵdarys jaǵdaıynda eldiń kólik ınfraqurylymy damydy, aýyl sharýashylyǵy qýatty serpin aldy, ol Qazaqstannyń kóptegen óńiriniń damý lokomotıvine aınaldy. Munaı baǵasynyń quldyraýy jaǵdaıynda agroónerkásiptik sektor bizdiń ekonomıkamyzdyń damý baspaldaǵy bola alady jáne bolýy kerek, munda bári tek ózimizge baılanysty.
Búgingi tańda bizdiń ekonomıkalyq, áleýmettik, tehnologııalyq, ǵylymı turǵyda qıyn-qystaý jaǵdaıdan shyǵýǵa qajetti múmkindikterimiz bar. Árıne qalyptasqan jaǵdaıda eń basty resýrstardyń biri –halqymyzdyń myzǵymas rýhanı áleýeti. Qazaqstan halqyna tán tabandylyq, batyldyq, óz kúshine degen senimdilik barlyq ýaqytta da almaǵaıyp kezeńniń synaǵyn erkin eńserýge múmkindik beredi.
Búginde halyqtyń alańdaýshylyǵy men qarapaıym azamattardyń qobaljýy kezinde ózderin halyqtyń qorǵaýshylary retinde tanystyra otyryp, jalǵan jańalyqtarmen jaǵdaıdy ýshyqtyrýǵa talpynatyndar da bar. Bul rette olar, ádettegideı, indettiń saldaryn azaıtý, ekonomıkalyq daǵdarysty aýyzdyqtaý, muqtajdarǵa kómek qolyn sozý úshin júrgizilip jatqan aýqymdy jumystarǵa qol ushyn da tıgizgen joq.
Elbasy osy popýlıstik jáne arandatýshylyq áńgimelerden aýlaq bolýǵa jáne naqty ıgilikti ispen aınalysýǵa, ózin ózi damytyp, ǵylym-bilimmen shuǵyldanýǵa shaqyrdy.
Qazaqstan halqy Assambleıasy karantın jaǵdaıynda qolda bar barlyq resýrsty paıdalana otyryp, azamattyq tatýlyq pen kelisimdi nyǵaıtý, tabysy az adamdardy qoldaý, karantındik is-sharalardy qamtamasyz etýge halyqty jumyldyrý jáne tótenshe jaǵdaı rejimi talaptaryn oryndaý jónindegi jumystardy jalǵastyrýda.
Naýryz aıynyń ortasynan bastap medısınalyq betperdeler daıyndaý jáne taratý boıynsha QHA-nyń respýblıkalyq «Biz birgemiz!» aksııasy ótýde. Búginde elimizdiń barlyq óńirinde 170 myńǵa jýyq qorǵanysh betperde muqtaj azamattarǵa tegin taratyldy. Assambleıanyń Kásipkerler qaýymdastyǵy, etnomádenı birlestikter men Dostyq úıleri, koreı, uıǵyr jáne nemis teatrlarynyń ujymdary qorǵanysh betperdelerin tigetin sheberhanalar uıymdastyrdy jáne halyqqa taratty.
Nursultan Ábishuly adamnyń óz-ózine degen senimi uly kúsh ekenin atap ótti jáne qorǵaýǵa muqtaj aǵa býyn ókilderin, ardagerlerdi, kóp balaly analardy, az qamtylǵan, eńbekke jaramsyz adamdardy qamqorlyqqa alýǵa shaqyrdy.
Assambleıanyń #BizBirgemiz qaıyrymdylyq aksııasy aıasynda elimizdiń barlyq óńirinde 66 myńnan astam adamǵa 83 mln 386 myń teńge somasyna gýmanıtarlyq kómek kórsetildi. Bul sandardyń artynda – qıyn sátte halyqpen birtutas ekenin sezinip, qolynan kelgen kómekten aıanbaı, qaıyrymdylyq sharalaryn uıymdastyrýǵa atsalysqan túrli etnostyń myńdaǵan ókiliniń eńbegi jatyr.
Assambleıa músheleri COVID-19 vırýsynyń indetine qarsy turý, karantındik rejimdi saqtaý jáne aldyn alý sharalary jóninde QHA aqparattyq-túsindirý jumystaryn uıymdastyrdy. Shyǵys Qazaqstan, Soltústik Qazaqstan, Pavlodar jáne basqa da oblystardyń Volonterler klýbynyń músheleri saqtyq sharalary týraly, sondaı-aq azyq-túlik satyp alý, HQO-dan qujattardy onlaın rejiminde resimdeý jáne alý múmkindigi týraly aqparattyq paraqshalardy taratýdy uıymdastyrdy. Osyndaı jumystar QHA áleýmettik jelilerinde de júrgizilýde.
Elbasynyń ár adam ózin-ózi damytyp, ǵylym-bilimmen shuǵyldanýǵa shaqyrýyna ún qosqan Assambleıa #Bizúıdemiz biryńǵaı heshtegimen is-sharalar ótkizýge bastamashylyq jasady. Túrli jelilik jobalar men beınesabaqtar uıymdastyryldy. Sonymen qatar QHA músheleri ınternet jelisinde memlekettik tildi onlaın oqytýdy uıymdastyrdy (V. Kım). Qaraǵandy qalasynyń Dostyq úıi etnostar ókilderine jáne qazaq, aǵylshyn tilderin oqytý boıynsha belsendi uzaq ómir súrý ortalyǵy ókilderine arnalǵan aptasyna tórt ret ótetin beınesabaqtar uıymdastyrdy. Qostanaılyq QHA memlekettik tildi oqytý boıynsha «Mámile. Sıtýatıvnyı kazahskıı» onlaın-sabaqtar serııasyn iske qosty. Soltústik Qazaqstan oblysynda «Mámile» jobasynyń onlaın nusqasy iske qosyldy (#onlaınMÁMILESQO), ol «@ank_sko» instagram paraqshasynda iske asyrylady. Osyǵan uqsas jobalar basqa oblystarda bastaldy.
Nur-Sultan qalasy QHA jastary, QHA «Jańǵyrý joly» respýblıkalyq jastar qozǵalysynyń elordalyq shtaby #Bizúıdemiz jobasyn qoldaý maqsatynda, Abaıdyń 175 jyldyǵyna oraı #ABAI175QHA heshtegimen beıne-chellendjge jáne «Kózimniń qarasy» ánin onlaın oryndaýǵa bastama jasady.
Qyzylorda oblysynda kórnekti aqyndar men jazýshylardyń shyǵarmalarynan úzindi oqý aksııasy ótkizildi. Betperdeler tigý boıynsha sheberlik sabaqtary – 4 rolık ornalastyryldy. «Instagram», «Odnoklassnıkı», «VKontakte», «Feısbýk» áleýmettik jelilerinde qan donorlyǵyn nasıhattaý boıynsha «Bizdiń qanymyz birdeı» beıne-chellendjin iske qosty. Barlyq óńir #BizBirgemiz chelendjin qoldaýǵa uqsas beınekontent ornalastyrdy. Uıǵyr, koreı jáne nemis ulttyq teatrlary ınternet jelisiniń túrli platformalarynda onlaın-kórsetilimder uıymdastyryp, spektaklder kestesin jarııalady.
Assambleıa óńirlerde karantındik is-sharalardy qamtamasyz etetin medısına qyzmetkerlerin, ishki ister organdary men TJK jeke quramyn, áskerı qyzmetshilerdi qoldaý jónindegi is-sharalarǵa qatysady. Almaty qalasynda Almaty oblysynyń № 11 qosalqy stansasyna kómek kórsetildi. 1 mln teńgege 160 azyq-túlik paketi qurylyp, 71 jedel járdem qyzmetkerine tapsyryldy. «Soltústik Qazaqstandaǵy «Assambleıa» korporatıvtik qory Petropavl qalasy aýrýhanalarynyń dárigerleri úshin obaǵa qarsy 25 kostıým satyp aldy. Qosymsha 10 arnaıy kostıým satyp alý josparlanýda.
Qostanaı oblysynyń QHA volonterleri zeınetkerler men Uly Otan soǵysynyń ardagerlerine tegin dári-dármekter taratýda medısınalyq mekemelerge qoldaý kórsetti. Almaty oblysynyń volonterleri Taldyqorǵan qalasynyń kireberisindegi sanıtarlyq beketterge ystyq túski as jetkizýdi qamtamasyz etti.
Bul – Assambleıa men Qazaqstan halqynyń Elbasynyń úndeýine naqty jaýaby. Elbasynyń «Bereke-birliktiń almaıtyn qamaly, baǵyndyrmaıtyn bıigi bolmaıdy» degen sózderi der kezinde aıtyldy. Bul qundylyqtar – Táýelsizdiktiń negizi, elimizdegi barlyq reformalardy is júzinde júzege asyrý tájirıbesimen dáleldendi.
Nursultan Nazarbaev sonymen qatar, aǵa býyn men zııaly qaýym ókilderine, jastarǵa, kásipkerlerge, jalpy alǵanda, búkil el halqyna qalyptasqan jaǵdaıdy eńserýge ózderiniń laıyqty úlesin qosýǵa shaqyrdy: «Biz – birtutas el, birligi berik jurtpyz. Men árqashan halqymmen birge bolǵanmyn, bul joly da sizdermen birgemin». Elbasynyń bul sózderi kóńilge senim, júrekke tynyshtyq, jumys isteýge talpynys jáne jeńiske umtylý sezimin uıalatady. Bizdiń árqaısymyz bul úndeýdi ár isimizge baǵyt retinde qabyldaýymyz kerek.
Janseıit TÚIMEBAEV,
Qazaqstan halqy Assambleıasy Tóraǵasynyń orynbasary – Hatshylyq meńgerýshisi
