Keshe Memleket basshysy Qasym-Jomart Toqaev Tótenshe jaǵdaı jónindegi memlekettik komıssııanyń kezekti otyrysynda áleýmettik járdemaqy alý úshin bankterde esep ashý máselesi qıyndyq týdyryp jatqanyn aıtyp, Úkimetke tólem kartalaryn qashyqtan alý máselesin 3 kún ishinde sheshýdi talap etken edi.
Búgin «Qazposhta» AQ Basqarma tóraǵasy Sáken Sársenov Kazpost Virtual qyzmetin iske qosqandaryn, 1000-nan astam vırtýaldy karta shyǵaryp úlgergenderin habarlady.
Bul qyzmet qazir post.kz saıtynda jáne AppStore-de qoljetimdi. Al Playmarket-te jańartýdy kútip otyr. Endi kez kelgen azamat smartfonnan úıden shyqpaı-aq onlaın túrde tólem kartalaryna jáne shot ashýǵa tapsyrys bere alady.
– Járdemaqy bólý týraly sheshim tez qabyldanyp, halyqqa taratý joldary da asyǵys qarastyryldy. Halyqqa arnaıy shottar ashýdyń negizgi aýyrtpalyǵy Qazposhtaǵa tústi. Jasyratyny joq, aýdandar men aýyldarda aqsha aýdarýǵa, tólemderdi tóleýge, karta ashýǵa bolatyn jalǵyz mekeme – Qazposhta. Biz, eń aldymen, áleýmettik baǵdarlanǵan kompanııa ekenimizdi jáne árqashan bizdiń azamattarymyzdyń múddelerine saı áreket etetinimizdi qaıtalaýdan eshqashan sharshamaımyn. Osy kúnderi bizdiń áriptesterimiz elimizdiń barlyq aımaqtarynda jumysqa shyǵyp eldiń zeınetaqy men járdemaqylaryn úılerine jetkizip berýmen qatar, áleýmettik tólemge quqyqtary bar azamattarǵa arnaıy shottardy ashyp berýde. Sońǵy 11 kúnde biz tek BJT máseleleri boıynsha 464 myńǵa jýyq azamatqa qyzmet kórsettik. 285 177 shot ashyp, 300 193 adamnan BJT qabyldadyq. Qazposhta arqyly 45 000 adam 42 500 teńge kólemindegi áleýmettik tólemaqysyn aldy, – dedi Sáken Sársenov.
Qazposhtanyń IT jáne Qarjylyq qyzmetter departamentterindegi qyzmetkerleri bólimshelerge kelmeı-aq, onlaın rejımde banktik shot ashýǵa múmkindik beretin júıeni tez arada iske qosýdy qolǵa alǵan. Vırtýaldy karta tegin ashylady jáne paıdalanǵa aqy talap etpeıdi.
Kazpost Virtual kartasyn zeınetaqy, járdemaqy jáne alımentterdi alýdan basqa, ınternet arqyly taýarlardy qaýipsiz satyp alýǵa paıdalanýǵa bolady. AliExpress-tegi árbir taýarǵa 1,5%, al basqa ınternet-dúkenderdegi taýarǵa 1% sashback qaıtarylady.
Sondaı-aq, Kazpost Virtual kartasynyń kómegimen post.kz saıtynda kommýnaldyq tólemderdi, ártúrli mekemelerdiń qyzmetterin tóleýge, aqshany kartadan kartaǵa aýystyrýǵa bolady.
