Onlaın kýrstar 13-17 sáýir aralyǵynda ótedi. Bes kúnge josparlanǵan onlaın kýrstarda kelesi máseleler ortaǵa salynady:
- qazaq termınderin qalyptastyrý, saraptamadan ótkizý, qazirgi aqparattyq tehnologııalar múmkindikterin paıdalanyp termınder nusqalaryn talqylaýǵa qashyqtan qatysý, qoldanysqa engizý;
- belgili bir sebeptermen qazaq tilin meńgermegen eresek azamattardy qazaq tilin oqytý úderisinde qazaq tilin meńgerý deńgeılerin baǵalaýdyń QAZTEST júıesin paıdalanýdaǵy jańalyqtar, ózgerister men qoldanysqa engizý máseleleri;
- qazaq álipbıin latyn grafıkasyna kóshirý úderisiniń ǵylymı negizdemeleri men ǵylymı-uıymdastyrýshylyq mindetterin iske asyrý joldary, Orfografııalyq jumys tobynyń sheshimderi;
- Qazaqstan Respýblıkasynda Memlekettik til saıasatyn iske asyrýdyń 2020-2025 jyldarǵa arnalǵan memlekettik baǵdarlamasynyń maqsattary men mindetterin óńirlerde iske asyrýdaǵy negizgi ındıkatorlar túsindirmesi, ındıkatorlarǵa qol jetkizý joldary, latyn grafıkasyna kóshý úderisi, jańa baǵdarlamadaǵy basymdyqtar;
- Qazaq tilin úırenýge yntaly azamattarǵa qazaq tilin oqytýda mashınalyq oqytý nemese jasandy ıntellekt tehnologııasy arqyly tildi úıretýge arnalǵan jańa portaldy paıdalaný joldary, portal arqyly biregeı júıe qalyptastyrý tetigi, qazaq tilin úırenýge tıimdi tehnologııalar.
Kýrstar barysynda tyńdaýshylar jańa memlekettik baǵdarlamanyń mindetterin óńirlerde iske asyrý boıynsha ózekti suraqtardyń jaýabyn alady. Sonymen qatar, kúndelikti turmysta, áleýmettik salalarda qazaq tiliniń qoldanys aıasyn keńeıtý tetikterin jetildirý joldarymen tanysady.
Kýrs Facebook álemettik jelisiniń ONLINE-da bol paraqshasynda ár kún saıyn 11:00-12:00 aralyǵynda tikeleı efırde júrgiziledi.
Eske sala keteıik, «Til-Qazyna» ulttyq ǵylymı-praktıkalyq ortalyǵy 30 naýryz ben 10 sáýir aralyǵynda óńirlik tilderdi oqytý ortalyqtarynyń ádiskerleri, oqytýshylary, magıstranttar men doktoranttarǵa arnalǵan «Memlekettik tildi oqytý ádistemesi» taqyrybynda 10 kúndik onlaın kýrstar ótkizgen edi. Kezekti onlaın kýrstar osy dástúrdiń jalǵasy ispetti bolǵaly tur.
Myna silteme arqyly: https://drive.google.com/open?id=1XOnU_kqw0gu24ae0 onlaın kýrstyń baǵdaramasyn júkteýge bolady.
