Ekonomıkanyń, bank salasynyń ahýaly, respýblıkalyq bıýdjettiń oryndalýy, memlekettik satyp alýlardaǵy jergilikti qamtý týraly ulttyq ekonomıka mınıstri R. Dálenov, Ulttyq bank tóraǵasy E. Dosaev, Premer-Mınıstrdiń birinshi orynbasary – qarjy mınıstri Á. Smaıylov, «Samuryq-Qazyna» UÁQ» AQ kompanııalarynyń kórsetkishteri týraly – Qordyń basqarma tóraǵasy A. Esimov, ónerkásip pen energetıka sektoryndaǵy jaǵdaı týraly ındýstrııa jáne ınfraqurylymdyq damý mınıstri B. Atamqulov, energetıka mınıstri N. Noǵaev, óńirlerdiń damýy týraly Qostanaı, Almaty, Aqtóbe oblystarynyń ákimderi A. Muhambetov, A. Batalov jáne O. Orazalın baıandady.
Bıyl qańtar-naýryz aılarynda JIО́ ósimi 2019 jyldyń sáıkes kezeńine 2,7% qurady. Negizgi kapıtalǵa salynǵan ınvestısııalar 5,1%-ǵa artty. Altyn-valıýta qory $30 mlrd jetti, Ulttyq qor aktıvteri – $57,5 mlrd.
Elimizdiń negizgi salalary jalpy oń dınamıka kórsetti. Taý-ken óndirisi salasyndaǵy ósim – 5%, óńdeý salasynda – 8,8%, qurylysta – 11,7%, mashına jasaýda – 30,4% kórsetti. Degenmen, álemdegi pandemııaǵa baılanysty engizilgen shekteýlerdiń áseri birtindep baıqala bastady — osy jyldyń birinshi toqsanynda saýdanyń ósýi 1%-dy, qarjy salasy men saqtandyrý qyzmetteri – 0,7%-dy qurady, al kólik sektory 1,3%-ǵa tómendep, teris dınamıka kórsetti.
Bıylǵy birinshi toqsanynyń qorytyndysy boıynsha negizgi kórsetkishter boıynsha áleýmettik-ekonomıkalyq damýdyń ósýiniń ozyq qarqyny Aqmola, Batys Qazaqstan, Túrkistan, Qostanaı, Qaraǵandy oblystarynda jáne Nur-Sultan qalasynda qamtamasyz etiledi, ortasha respýblıkalyq kórsetkishterge Almaty, Aqtóbe, Mańǵystaý, Soltústik Qazaqstan, Pavlodar, Shyǵys Qazaqstan oblystarynda jáne Almaty qalasynda qol jetkizildi, keıbir kórsetkishter boıynsha respýblıkalyq deńgeıden tómen deńgeıdi Atyraý, Jambyl, Qyzylorda oblystary, sondaı-aq Shymkent qalasy kórsetti.
Úkimet basshysy ortalyq jáne jergilikti atqarýshy organdardyń birinshi basshylaryna bıýdjet qarajatynyń ýaqytyly ári sapaly ıgerilýin, onyń ishinde olardyń ekonomıkanyń naqty sektorlaryna deıin jetkizilýin baqylaýda ustaýdy tapsyrdy.
Premer-Mınıstr álemdik jáne óńirlik ekonomıkalardaǵy qazirgi syn-tegeýrinderge jaýap retinde Úkimettiń daǵdarysqa qarsy sharalar keshenin qabyldap, iske asyryp jatqanyn atap ótti — Jumyspen qamtýdyń jol kartasy bekitildi, qurylysty keńeıtý boıynsha birqatar memlekettik baǵdarlamalardy qarjylandyrý ulǵaıtyldy, ShOB kásiporyndaryn salyqtyq yntalandyrý engizildi, «Qarapaıym zattar ekonomıkasy» jeńildikpen nesıelendirý baǵdarlamasy keńeıtildi.
«Qajet sharalar qabyldandy, endi óńirler qarqyndy jumys isteýi kerek. Barlyǵy memlekettik organdardyń tıimdi jáne úılesimdi jumysyna baılanysty», — dep A. Mamın, qatań sanıtarlyq-epıdemıologııalyq sharalardy saqtaýmen óńirlerde daǵdarysqa qarsy sharalardyń iske asyrylýyna baqylaýdy qamtamasyz etýdi tapsyrdy.
