«Tótenshe jaǵdaı rejımi engizilgen sátten bastap Beeline jelisindegi mobıldi trafıkti tutyný orta eseppen 10%-ǵa ósti. Bul aı saıynǵy ósý qarqynynan sál ǵana artyq, ádette aı saıynǵy ósý qarqyny 5% deńgeıinde bolatyn. Sondaı-aq ornyqty, ıaǵnı symdy ınternet trafıgi 30%-ǵa ósti. Bul oraıda, trafık bólý kartasy birshama ózgerdi. Abonentterimiz ýaqytynyń basym bóligin úıde ótkizedi. Sáıkesinshe, ornyqty ınternetke qosylý múmkindigi bar jerlerde mobıldi jelige múlde júk túsken joq. Biz adamdardyń qashyqtan jumys isteýge qalaı kóshkenin, ýaqytynyń basym bóligin úıde ótkize bastaǵanyn júktemeden kórdik», dedi Evgenıı Nastradın.
Osy oraıda ol Beeline kompanııasynyń tótenshe jaǵdaıǵa qańtar-aqpan aılarynda-aq daıyndyq jumystaryn bastap ketkenin atap ótti.
«Qańtarda indet Qytaıda tarala bastap, qatań karantın engizilgen kezde, tutynýshylardyń kóptiginen operatorlar jelisindegi júktemeniń qalaı ózgergenin kórdik. Qytaıdaǵy seriktesterimiz bolyp jatqan iske sholý jasap, aqparattaryn bizben bólisti. Sondyqtan qańtar-aqpan aılarynda-aq aldyn alý sharalaryn jasadyq. Mobıldi jelide de, ornyqty baılanysta da tirek jelisi keńeıtildi. Tasymaldaýshy arnalarda syıymdylyqty ulǵaıttyq. Qurylǵan rezerv qazir bizge jetedi. Beeline jelisinde shamadan tys júkteme, aıtarlyqtaı apat tirkelgen joq», dedi ol.
Sondaı-aq ol aldaǵy ýaqytta artyq júk túsip, aqaýlar oryn almas úshin, syıymdylyqtyń artatynyn aıtty.
«Qazaqstandaǵy barlyq operatormen birigip, bir jyldyń ishinde 1000-nan astam eldi mekendi keń jolaqty ınternetpen qamtýdy josparlap otyrmyz. Joba júzege asyryla bastady. Stýdentter men oqýshylardyń bilim beretin resýrstarǵa qosylýyn qamtamasyz etý úshin, BǴM-ǵa onlaın-oqýdy uıymdastyrýǵa qatysty tehnıkalyq keńesteri bar hat ázirledik. Qazaqstanda 2,7 mıllıon oqýshy men mıllıonǵa jýyq stýdent qashyqtan oqýǵa kóshirildi. 1 sáýir kúni synaqtama túrinde ótken onlaın sabaqtar barysynda Beeline jelisinde apat tirkelgen joq. Bizdiń derekter boıynsha, oqýǵa jumyldyrylǵan servıster júktemeni kótere almady», dedi E.Nastradın.
