Pandemııaǵa qarsy is-qımyl kezeńinde kórshiles elderge ekonomıkalyq qoldaý kórsetý maqsatynda Qazaqstan Prezıdenti Qasym-Jomart Toqaev Qyrǵyzstan men Tájikstanǵa gýmanıtarlyq kómek retinde jalpy quny 3 mln AQSh dollarynan asa somaǵa árqaısyna 5 myń tonnadan qazaqstandyq un jetkizý týraly sheshim qabyldady. Sheshim halyqty azyq-túlikpen úzdiksiz qamtamasyz etý maqsatynda qyrǵyz jáne tájik taraptarynyń resmı ótinishterine baılanysty qabyldandy.
Memleket basshysy Qasym-Jomart Toqaevpen telefon arqyly sóılesý barysynda Tájikstan Prezıdenti Emomalı Rahmon tájik halqyna osy qıyn kezeńde qoldaý bildirip, gýmanıtarlyq kómek kórsetkeni úshin alǵysyn jetkizdi. Sondaı-aq ol Tájikstan azamattaryn Otanyna jetkizýge yqpal etkeni jáne Qazaqstan aýmaǵy arqyly júkterdi tasymaldaýǵa kómekteskeni úshin rızashylyǵyn bildirdi.
Sonymen qatar Qazaqstan jáne Qyrǵyzstan Syrtqy ister mınıstrleri Muhtar Tileýberdi men Chıngız Aıdarbekov telefon arqyly sóılesip, qyrǵyz tarapy Qazaqstanǵa gýmanıtarlyq kómek kórsetý týraly sheshim qabyldaǵany úshin shyn júrekten alǵys bildirdi.
Jaqyn arada atalǵan júkter Qyrǵyzstan men Tájikstanda jetkiziledi.
Qazaqstan halyqaralyq qoǵamdastyqtyń jaýapty múshesi retinde jahandyq koronavırýs pandemııasy jaǵdaıynda beıjaı qalmaı seriktes elderge qajetti gýmanıtarlyq kómek kórsetýdi jalǵastyryp jatyr. Bıyl aqpanda COVID-19 indetiniń órship turǵan kezinde Qazaqstan alǵashqylardyń biri bolyp Qytaıǵa medısınalyq qorǵaý quraldaryn birneshe ret jetkizý arqyly áriptestik qoldaý kórsetti.
Jalpy gýmanıtarlyq kómek kórsetý – Qazaqstannyń syrtqy saıasatynyń mańyzdy baǵyttarynyń biri. О́tken jyldary Qazaqstan Antıgýa men Barbýda, Aýǵanstan, Bangladesh, Qyrǵyzstan, Moldova, Mońǵolııa, Mıanma, Pákistan, Serbııa, Sırııa, Túrkııa, Japonııa jáne taǵy basqa elderge ártúrli kómek jiberdi.
