Búginde óńirde táýlik boıy 101 beket jumys isteıdi. Bular – Kókshetaý men oblys aýdandaryndaǵy kirý jáne shyǵý joldarynda ornatylǵan 82 blok-beket jáne 19 sanıtarlyq beket. Sanıtarlyq bekettiń 8-i oblys perımetri boıynsha jáne qalǵany Nur-Sultan qalasynyń aınalasyna qoıyldy.
Polısııa qyzmetkerleri men sanıtarlyq-epıdemıologııalyq qyzmet ókilderi blok-beketterdegi qyzmetti táýlik boıy atqarady. Kún saıyn tańerteń jáne keshke vedomstvo qurylymdarynyń basshylary aýysymǵa túsetin jol polısııasy batalonynyń jeke quramyna nusqama ótkizedi. Jeke qorǵaný quraldarynyń, medısınalyq maskalardyń, dezınfeksııalaý quraldarynyń, sondaı-aq elektrondyq planshetterdiń bolýyn tekseredi.
Polısııa qyzmetkerleriniń basty mindeti – kólik júrgizýshilerine jazalaý sharalaryn qoldaný emes, eń aldymen engizilgen shekteýlerdi túsindirý, sondaı-aq óńirlerdiń tynys-tirshiligin qamtamasyz etetin avtokólikterdiń kedergisiz júrýin qamtamasyz etý.
