Kólik baqylaý departamenti qyzmetkerleri 30 naýryzǵa deıin alty tosqaýyl beketinde – Nur-Sultan qalasy jáne Jibek joly, Qoıandy, Ilınka, Talapker, Qosshy aýyldary mańynda jumys istegen. Búginde olar Jibek joly beketinde saǵat 9.00-den 1.00-ge deıin, Qoıandy jáne Kókshetaý beketterinde saǵat 16.00-den 1.00-ge deıin qyzmet kórsetedi.
Atalǵan qyzmetkerler ózderiniń salasyna sáıkes avtobýs júrgizýshileri men jolaýshylardy teksermeıdi, tek tosqaýyl beketterinen ótip jatqan azamattarǵa keńes beredi. Olardyń jumys kestesi – aýysymdy. Jumys ýaqyty bastalar aldynda medbıkeler barlyq qyzmetkerlerdiń dene qyzýyn ólsheıdi. Beketterdiń ózderi arnaıy zalalsyzdandyrý quraldarymen jabdyqtalǵan.
«Koronavırýstyń keń taralýyna jol bermeý úshin qolǵa alynǵan sharalarǵa quqyq qorǵaý organdarymen jáne ákimdik qyzmetkerlerimen birlesip bizdiń qyzmetkerler de atsalysyp jatyr. KBD qyzmetkerleri ári-beri ótken adamdardyń meken-jaıyn, tirkelgen jerin, qaıdan kele jatqanyn jáne taǵy basqa sebebin anyqtaıdy. Jolaýshylarmen qosa jeńil kólik jáne júk tasymaldaıtyn kólikterdi tekseredi. Olardyń TJ kezeńinde júrip-turý úshin ruqsat qujattarynyń bolýyn qadaǵalaıdy. Barlyq qyzmetker betperde, qolǵap jáne antıseptıkalyq quraldarmen qamtyldy», – deıdi Kólik baqylaý departamentiniń dırektory Samat Shaımerdenov.
