Qazynaǵa qol suqqandar jazasyz qalmaıdy

Sybaılas jemqorlyqqa qarsy is-qımyl agenttiginiń óńirlerdegi departamentteri bıýdjet qarajatyna qol suqqandar men qyzmetin buldap para dámetkenderdiń jymysqy áreketterin anyqtady.

Qostanaı oblysyndaǵy departament túrli aıla-sharǵymen mem­lekettik sýbsıdııadan 37 mln teńgeni jymqyrdy degen kúdikpen birqatar azamatty sotqa deıin tergeı bastady. Kúdikke ilingender – oblystyq Aýyl sharýashylyǵy jáne jer qatynastary basqarmasynyń laýazymdy tulǵalary, sondaı-aq Jitiqara jáne Jangeldın aýdandary ákimdikteriniń aýyl sharýa­shylyǵy bóliminiń bas mamandary. Olar jaıylym jáne mal ósirý sharýashylyǵyn sýmen qamtamasyz etý boıynsha sharýa qojalyqtarynyń is júzinde oryndamaǵan jumystaryn rastaý arqyly qomaqty qarjyny qaltaǵa baspaq bolǵan.

Agenttiktiń Almaty oblysy bo­ıynsha departamenti qyzmetin asyra paıdalanyp para alýdyń eki faktisin nazarǵa aldy. Onyń biri mal urlaǵan azamatty jaýapkershilikke tartpaý úshin 300 myń teńge alǵan Ile aýdandyq polısııa basqarmasynyń jedel ýákili boldy.

Buǵan qosa JShS qyzmeti týraly tekserý aktisine sáıkes oń sheshim shyǵarǵany úshin 665 myń teńge aldy degen kúdikpen Tótenshe jaǵdaılar departamentiniń Qarasaı aýdanynyń Tótenshe jaǵdaılar jónindegi bólimi bastyǵy men aǵa ınjeneri sotqa deıin tergeledi.

Aqtóbe oblysynda KA-168/1 meke­mesi kúzetiniń ınjenerlik-tehn­ı­ka­lyq quraldarynyń kúrdeli jóndeýi­ne bólingen 5 mln teńge somasyn­daǵy bıýdjet qarajatyn jymqyrǵan  IIM QAJK «Eńbek-Aqtóbe» RMK oblystyq fılıalynyń dırektoryna qatysty qylmystyq is tergelip jatyr. Izdeýde bolǵan kúdikti ustalyp, Aqtóbe qalasynda Ishki ister departamentiniń ýaqytsha ustaý ızolıatoryna qamaldy.

Shyǵys Qazaqstanda stansanyń kezekshisinen jalpy qamqorlyǵy úshin 200 myń teńge alǵan «QTJ-Júk tasymaly» AQ Semeı fılıaly «Jańǵyz-Tóbe» stansasynyń bastyǵyna qatysty qylmystyq isti tergeýdi bastady.

Buǵan qosa Nur-Sultan qalasy boıynsha departament jeke kásipker­ler­den memlekettik satyp alýlar týraly kelisimshart jasaǵany jáne sol boıynsha tólem júrgizgeni úshin jalpy somasy 623 myń teńge kóleminde para aldy degen kúdikpen astanalyq mektep dırektoryn sotqa deıin tergeı bastady.

Joǵaryda atalǵan kúdikti tulǵa­lardyń kinásiniń dárejesin anyqtap, túpkilikti sheshimdi sot shyǵarady. О́tken aptada osyndaı qylmysy dáleldengenderge qatysty birqatar úkim shyǵaryldy.

Osyǵan deıin Pavlodar oblysy­­nyń Sybaılas jemqorlyqqa qarsy qyz­meti 2018 jyly taýarlyq-materıal­dyq qundylyqtardy satyp alý týraly jalǵan mámile jasasý arqyly 6,3 mln teńge kólemindegi bıýdjet qarajatyn jymqyrǵan «Qazaqstan sý joldary» RMQK Pavlodar fılıalynyń basshysyn sotqa deıin tergegen. Bıyl 7 sáýirde Pavlodar qalasynyń №2 sotynyń úkimimen atalǵan basshy 2 jyl merzimge bas bostandyǵynan jáne ómir boıyna memlekettik qyzmette laýazym atqarý quqyǵynan aıyryldy.

Soltústik Qazaqstan oblysyndaǵy departament enshiles kásiporyndardy tartý arqyly jerge ornalastyrý jáne jer kadastrlyq jumystaryn júrgizý boıynsha qyzmetterge aqy tóleý retinde bólingen 574 mln teńge bıýdjet qarajatyn qaltaǵa basqan oblys ákimdiginiń Qarjy basqarmasy basshysynyń orynbasary A.Z.Qalıevke qatysty sotqa deıingi tergeýdi aıaqtady. 2020 jyly 4 sáýirde Petropavl qalasy sotynyń úkimimen A.Z.Qalıev 8 jylǵa bas bostandyǵynan aıyrylyp, ómir boıy memlekettik qyzmetten alastatyldy. Osy úkimmen D.B.Qalıeva 6 jylǵa bas bostandyǵynan aıyryldy.

Sonymen qatar aýdandyq sottyń tóraǵasyna qatysty Qylmystyq-pro­sessýaldyq kodekstiń 200-babyna sáıkes jasalǵan usynysty qaraý ná­tıjeleri shyqty. Buǵan deıin Sybaı­las jemqorlyqqa qarsy qyzmet qyl­mys jasaý týraly jalǵan faktisi boıynsha sotqa deıingi tergeý barysynda qylmystyq quqyqbuzýshylyq pen basqa da zań buzýshylyqqa ákelip soqqan jaǵdaılardy joıý boıynsha usynym engizgen edi.

Qazaqstan Respýblıkasy Sýdıa­lar odaǵynyń Almaty fılıaly sýdıalarynyń etıkasy Komıssııa­synyń 2020 jylǵy 3 sáýirdegi hatta­malyq sheshimimen Almaty qalasynyń Almaly aýdandyq sotynyń tóraǵasy Q.Áripovke qatysty sot etıkasyna qaıshy keletin tártiptik teris qylyq jasaǵany úshin qoǵamdyq aıyptaý shyǵaryldy.