Búgin Sybaılas jemqorlyqqa qarsy is-qımyl agenttiginiń ákimshilik-quqyqtyq departamentiniń dırektory Aıgúl Bazarbaeva onlaın rejımde ótken baspasóz máslıhatynda Elbasy men Memleket basshysynyń tapsyrmalaryna sáıkes agenttik jańa bastamalardy qolǵa alyp otyrǵanyn málimdedi. Sonyń biri – jemqorlardyń jaýapkershiligin qatańdatý máselesi. Bul rette aýyr jáne asa aýyr sybaılas jemqorlyq qylmysymen sottalǵan adamdardyń jazasyn óteý merzimin ulǵaıtý usynylyp otyr.
Mundaı sheshimge kelerde BAQ betterinde jarııalanǵan materıaldarǵa monıtorıng jasalǵan eken. Nátıjesinde sottalǵan jemqorlardyń shartty túrde bostandyqqa shyǵýy qoǵamnyń yzasyn týdyratyny baıqalǵan. Kópshilik bıýdjet qarajatyn mıllıondap jymqyrǵan jáne laýazymyn asyra paıdalanǵan tulǵalardyń jazany jeńildetýge bolmaıdy, olar merzimin tolyq óteýi tıis degen pikirde.
Buǵan qosa agenttik ókili arnaıy saýaldama júrgizgenderin, oǵan 58 myń adam qatysqanyn atap ótti. Respondentterdiń 63%-y jemqorlardyń ádil jazalanbaıtynyn jáne olar úshin jazany jumsartýdyń quqyqtyq amal-sharǵylary bar ekenin alǵa tartqan.
Sondyqtan agenttik sybaılas jemqorlyqtyń jazasyn barynsha kúsheıtýdi qarastyryp jatyr. Usynystardyń ishinde jemqorlarǵa salynatyn aıyppuldardy alyp tastaý máselesi de qozǵalǵan. Bul olardyń jazasyn jeńildetýge, sýdıalardyń bura tartýyna sep bolady degen kózqaras bar.
