2010 jyly Halyqaralyq sırk qaýymdastyǵy Monako hanshaıymy Stefanııanyń demeýshiligimen, sáýir aıynyń úshinshi senbisin sırk kúni etip saltanatty túrde merekelik rýhpen ótkizeıik, sol arqyly sırk qyzmetkerleriniń kásiptik yntymaǵyn, dostyq qarym-qatynasyn arttyraıyq degen nıetpen bastama kóteredi. Sodan beri bul kún halyqaralyq sırk kúni retinde atalyp keledi. Aqparat almasý, festıvaldik sharalar, jańa sırk ujymdarynyń uıymdasýyna qoldaý kórsetý, ózara qarym-qatynas shyǵarmashylyq ıelerine tyń serpin berdi.
Qaýymdastyq Máskeýde ótetin dástúrli «Idol», Nur-Sultan qalasynda ótetin «Azııa jańǵyryǵy» festıvaldaryna belsene qatysyp, sırk óneriniń jalpy deńgeıin, rekordtyq jetistikterin saralap, Monte-Karloda ótetin festıvalge shaqyryp, shyǵarmashylyqty yntalandyryp otyrady. Bul kúnde Monakoda ornalasqan qaýymdastyqtan quttyqtaýlar kelip jatady.
Qurylǵanyna nebári 8 jyl bolǵan Shymkent-sırk ujymy da tez arada kásiptik sheberlikterin shyńdap, mártebeli baıqaýlarda bıikten kórine bildi. Osylaısha qaýymdastyqtyń múshesi retinde óz ornyn aıqyndady.
50 jyldyq tarıhy bar Qazaq memlekettik sırkiniń (respýblıkada 3 ǵana kásiptik sırk bar) quramdas bir bóligi bolyp tanylatyn ujym akrobattar men gımnastardyń, jonglerlik, voltıj, ekssentrıka, ıllıýzııa óneriniń sheberlerin daıyndap, kezeń-kezeńimen jańa qoıylymdar daıyndap, kórermenin tańǵaldyryp keledi.
Atap aıtar bolsaq, kermeli arqanda erkin júrip óner kórsetetin aǵaıyndy Suranshıevter, keremet eptilik pen erjúrektilikti, tepe-teńdiktiń joǵary nusqasyn talap etetin «Semafor» attraksıonyndaǵy has sheberler megapolıs turǵyndaryn tańǵaldyrýdan sharshaǵan emes.
Sırk ónerindegi ulttyq boıaýy qanyq Q.Dúısequlovtyń jetekshiligindegi shabandozdar tobynyń, qazaq qyzdarynyń ishinde búgingi tańda top jaryp, jeke dara jyrtqysh ańdarmen óner kórsetetin dressýra sheberi J.Qalmetovanyń táýekeli de kórermendi shapalaq soqtyryp, delebesin qozdyryp-aq keledi. Al E.Tańatov, Á.Ábdrazaqtyń kóńildi ázildermen kómkerilgen kloýndyq oıyndary kishkentaı kórermenniń qııalyn aspandatyp, alysqa jeteleı túsýde.
2019 jylǵy «Azııa jańǵyryǵy» festıvaliniń qos júldegeri «Baıqońyr» jáne «Serippeli taqtaılar» qoıylymdary tek Shymkent sırkiniń ǵana emes, ulttyq sırkimizdiń altyn qoryna kirgen dúnıeler desek artyq bolmas. Osy 8 jyl ishinde Shymkent-sırk ártisteri Nur-Sultan, Kókshetaý, Qyzylorda, Taraz, Túrkistan syndy elimizdiń birqatar qalalarynda bolyp, táýekeli basym ónerge sýsaǵan kórermenge óz qoıylymdaryn kórsetti. Sondaı-aq Shymkent-sırk tolyqqandy oıyn baǵdarlamalaryn shapıto nusqasymen kóptegen aýdan ortalyqtary men qalalarda kórsetýdi dástúrge aınaldyrdy.
О́nerdiń bıik murattaryna berik ujym atynan barsha otandyq áriptesterimizdi tól merekesimen quttyqtaımyz. Qoıylymdarymyzdy asyǵa kútken patsha kóńil kórermenderimizdi álemdi álekke salǵan koronavırýs indetinen qutylǵan shýaqty kúnderde kórýge asyǵamyz.
Arman ÁLIHAN,
«Shymkent-sırk» memlekettik kommýnaldyq qazynalyq kásipornynyń dırektory
