IIM ortalyq apparatynyń jetekshi qyzmetteri men bólinisteri azyq-túlikter men birinshi kezekte qajetti taýarlardy jetkizdi. Aldyn alý sharalaryn saqtaı otyryp, IIM qyzmetkerleri qart adamdar, turmysy tómen otbasylardan shyqqan jetim balalar ornalasqan birqatar elordalyq mekemege bardy. Kóp balaly otbasylar men erekshe balalary bar otbasylardy da qoldap, qamqorlyq kórsetti.
Mınıstrliktiń Tergeý departamentiniń delegasııasy múmkindigi shekteýli balalardy tárbıelep otyrǵan segiz otbasyna bardy.
«IIM ortalyq apparatynyń tergeýshileri azamattyq ustanymdaryn bildire otyryp, ásirese, azyq-túlik turǵysynan kómekti qajet etetin astanalyq otbasylardy qoldaýǵa bel býdy jáne olarǵa karantındi qatań saqtaǵany úshin alǵys bildirdi», dep atap ótti Departament bastyǵy Sanjar Ádilov.
Esirtki qylmysyna qarsy is-qımyl departamentiniń jáne kóshi-qon qyzmeti komıtetiniń basshylary ómirdiń qıyn jaǵdaıynda júrgen balalardy qoldaý ortalyǵyna azyq-túlik sebetterin, sondaı-aq jemis-jıdekter men táttilerdi ákeldi.
«Búgin biz eń qorǵalmaǵan – qıyn ómirlik jaǵdaıǵa tap bolǵan balalardy qoldaý ortalyǵynyń tárbıelenýshilerine kómek kórsetýden tys qala almaımyz. Qazir olar barlyq ýaqytta karantın sharttaryn saqtap, úı-jaıdan shyqpaı otyr. Sondyqtan Ishki ister mınıstrligi olarǵa kóńil-kúı syılap, olardyń ımmýnıtetterin kóteretin syılyqtar daıyndady. Bizdiń shaǵyn kómegimiz ortalyq tárbıelenýshilerin qýantady jáne qoldaıdy dep úmittenemin», - dedi esirtki qylmysyna qarsy is-qımyl departamentiniń bastyǵy Tilegen Mátkenov.
IIM-niń kadr saıasaty, ózindik qaýipsizdik jáne aqparattandyrý jáne baılanys salasynyń qyzmetkerleri múgedek balalarǵa arnalǵan arnaıy ınternatqa bardy. Olar balalarǵa azyq-túlik apardy. Mekeme basshylyǵy polıseılerge kóńil bólgeni úshin alǵys aıtyp, bul kómektiń ýaqtylyǵy men qajettiligin atap ótti.
Qart adamdar da nazardan tys qalǵan joq. Ákimshilik polısııa jáne tótenshe jaǵdaılar komıtetteriniń, sondaı-aq krımınaldyq polısııa departamentiniń basshylary astanalyq qarttar úıine azyq-túlik pen birinshi kezektegi qajetti taýarlardy ákeldi. Sondaı-aq, qaıyrymdylyq kómek qala ákimdiginiń «Sharapat» áleýmettik qyzmet kórsetý ortalyǵyna jetkizildi.
«Búgingi tańda koronovırýstyq ınfeksııa 60 jastan asqan qart adamdarǵa asa qaýipti. Biz adamnyń jasy kelgen saıyn ımmýnıteti álsireıtinin, al sozylmaly aýrýlardyń bolýy aýyrý kezinde jaǵdaıdy ýshyqtyratynyn túsinemiz. Sondyqtan qarttar úılerine erekshe kóńil bólip otyrmyz. Immýnıtetti nyǵaıtý úshin biz ár túrli dárýmendi taǵamdarmen, paıdaly azyq-túlikpen qamtamasyz etýdi sheshtik», dedi TJK tóraǵasy V. Bekker.
О́z kezeginde mekeme ókilderi kórsetilgen kómek úshin alǵystaryn bildirdi.
