Ramazan – saýap pen kemeldený aıy

«Ár azamattyń ómiri men den­saý­lyǵy qymbat qundylyq bolǵan­dyqtan, juqpaly indettiń aldyn alý úshin osyndaı sheshim qabyl­daýǵa májbúr boldyq. Árıne bul – ýaqytsha synaq. Alaı­da jamaǵat namazy úshin meshit esigi jabylǵanymen, saýap pen izgi­lik esikteri eshqashan jabyl­maı­dy. Qasıetti hadıs-sharıfte aı­tyl­ǵandaı, musylmannyń nıeti ama­lynan qaıyrly. Onlaın rejim­de nasıhat tyńdap, úıden shyq­paı saýapty amaldarǵa ortaq­tasýǵa bolady. Atap aıtqanda, Qazaq­­stan musylmandary dinı bas­qar­­masy bıylǵy qasıetti Rama­zan­da jamaǵattyń ıgiligi úshin my­nadaı jobalardy iske asyrý­­dy josparlap otyr. Qazaq­s­tan musylmandary dinı basqar­masynyń www.muftyat.kz saıtynan «Ramazan ensıklopedııasy» qosymsha paraqshasy qosylyp otyr. Elimizdegi oblys ortalyqtary men aýdan, qalalardyń, kentterdiń Ramazan kestesi qazaq jáne orys tilderinde www.muftyat.kz saıtyna ornalastyryldy. «Hıkmet TV» stýdııasy arqyly 30 kún oraza boıy bilikti ımamdarymyz ben ustazdarymyzdyń «Otyz kúnge – otyz ýaǵyz» atty onlaın joba dáristeri júrgiziledi. «Hıkmet TV» stýdııasy arqyly Ramazan aıynda kún saıyn Respýblıkalyq «Áziret Sultan» meshitiniń qabyrǵasynda kúnine bir saǵat arnaıy onlaın-hatym oqylyp, qasıetti Qadir túninde Quran hatym duǵasy jasalady. Sondaı-aq muslim.kz Instagram paraqshasy arqyly ımamdarmen bir tolqynda duǵa jasaýǵa nıettelgen jamaǵattyń ıgiligi úshin Ramazan aıynyń birinshi kúninen bastap, kúndelikti ár 15 mınýt saıyn Respýblıkalyq «Áziret Sultan» meshitiniń qabyrǵasyn­da «Batamen el kógerer» atty onlaın rejimde duǵa jasap, bataǵa qatysý rásimi uıymdastyrylatyn bolady», dedi Bas múftı.

Sonymen qatar ol tótenshe jaǵdaı kezinde pitir sadaqasy men zeketti onlaın rejimde berýdiń ońtaıly joly oılastyrylǵanyn da ortaǵa saldy.

«Osyǵan deıin habarlaǵany­myz­daı bıyl Ramazan aıy 24 sáýir­de bastalady. Bul týraly osyǵan deıin habarladyq. Mamyr aıynyń 19-nan 20-syna qaraǵan tún – myń aıdan qaıyrly bolǵan qasıetti Qadir túni. Alla qalasa 24 mamyrda Oraza aıt namazyn oqımyz. Jaratqan Jabbar Iemiz Oraza aıtty meshitterimizde jamaǵatpen oqýdy jazǵaı! Osynaý qýanyshty kúndi jaqyn etkeı! Ámın! Ramazan – jaqsylyqta jarysatyn aı. Alla taǵala qasıetti Quranda «Baqara» súresiniń 148-aıatynda: «Árkimniń bir bet alatyn qubylasy bar. Sonda jaqsylyqqa jarysyńdar», dep baıandaıdy. Aýyz bekitken jan­darǵa azyq-túlik jetkizip ber­seńiz de aýyz ashtyrǵannyń saýa­byn alasyz. Tipti kómekke muq­taj otbasylarǵa aýyzasharǵa ketetin shyǵyndy berip, qarjylaı qoldaý kórsetseńiz de mol saýapqa kene­lesiz. Joǵaryda aıtqany­myzdaı, musylmannyń nıeti amalynan qaıyrly. Osy rette barsha otandastarymdy: Kómekke muq­taj otbasylarǵa jan-jaqty qol­daý kórsetýge, eli­mizdegi meshit­ter arqyly aýyzy berik otandas­tary­myzǵa aýyzashar taǵamdar tara­týǵa shaqyramyn! Sadaqa – pen­deniń mal-dáýletin azaıtpaıdy, kerisinshe, berekesin arttyrady. Biz bergen sadaqa bir otbasyn qýanyshqa bóleıdi. En­deshe kómekke zárý shańyraqty shat­tyq­qa bólep, úlkenniń batasyn alyp, alǵysyna bóleneıik. Alla Elshisi: «Kimde kim baýyry­nyń qajetin ótese, Alla onyń qajetinde bolady. Kimde kim musyl­mannyń bir qaıǵysyn seıiltse, Alla onyń qaıǵy-qasi­retteriniń birin seıiltedi», degen. Halyq danalyǵynda aıtylatyn: «Qaıyrymdylyq jasasań – qaıyryn óziń kóresiń», degen naqyl sózdiń máni osy bolsa kerek. Túıindep aıtqanda, Oraza – saýap jınap, rýhanı kemeldený aıy. Ramazan – Rabbymyzdyń meırim-mahabbatyna bólenetin aı», dedi Naýryzbaı qajy Taǵanuly.