1920 jyly Omby oblysynda týǵan Myrzabolat Sháımenov 16 jasynda qazirgi Birjan sal aýdanyna kóship kelgen. 7 synyptyq bilimmen pedýchılısheni támamdaǵan. Arhıv betterinen tabylǵan derekterge súıensek, ol 1941-1944 jyldar aralyǵynda Prıbaltıka maıdanynyń 52-shi qupııa gvardııasynyń atqyshtar dıvızııasynda barlaýshy bolǵan.
– Qaı jerde soǵysqany, soǵysta qandaı jaǵdaı bolǵany týraly tis jaryp aıtqan emes. Bar qupııany ózimen birge ala ketti. 2017 jyly as beremiz dep qamdanǵanda, jıenimiz «Podvıg naroda» dep atalatyn saıtta derekter boldatyndyǵy týraly estipti. Aqtaryp kórsek, áke erligi taıǵa tańba basqandaı jazýly tur, – deıdi ardagerdiń qyzy Aıgúl Shámshýalıeva.
Arhıvtegi derekter boıynsha qan maıdanda qaısarlyq pen batyldyq kórsetken Myrzabolat Sháımenov eki márte «Erligi úshin» medalimen, 2-shi jáne 3-shi dárejeli «Dańq» jáne «Qyzyl Juldyz» ordenderimen marapattalǵandyǵy belgili bolyp otyr.
Batyrdyń qyzy Aıgúl Shámshýalıvanyń qaıyn atasy da maıdanda erlik kórsetken jaýyngerlerdiń biri. 1920 jyly dúnıege kelgen Sabaǵat Shamshýalıev 1941 jyly áskerge attanǵan. 19-shy gvardııalyq atqyshtar dıvızııasynda starshına bolǵan. 1943 jyly aýyr jaraqat alǵan Sabaǵat atamyz iz-túzsiz joǵalǵandardyń tiziminde bolǵan. Keıin onyń jaralanyp, aýrýhanaǵa túskeni belgili bolady. Búginde artynda qalǵan balalary «Germanııany jeńgeni úshin», 1-shi dárejeli «Erligi úshin» medalimen, «Uly Jeńistiń 40-jyldyǵy» medalimen marapattalǵanyn aıtyp, eske alýda.
– Birjan sal aýdanynyń Uly Jeńis ardagerlerine arnap ornatylǵan eskertkishine Sabaǵat atanyń esimi jazylǵan. О́kinishke oraı, bul taqtaǵa ákemniń aty engizilmegen, – deıdi Aıgúl Shámshýalıva qamyǵyp.
Qaharman jaýyngerdiń erligi endi belgili bolyp otyr. Arada qansha jyl ótkennen keıin. Erligi eshqashan umytylmaıdy deıtini osyndaıdan-aý, sirá.
Birjan sal aýdany,
Aqmola oblysy.
