Zań jobasyna jaýapty senator S.Eńsegenov «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zańynyń jobasyn ázirleý kezinde halyqaralyq tájirıbeler muqııat zerdelenip, eskerilgenin atap ótti. Senator sondaı-aq bul zań jobalary Qazaqstan Respýblıkasy azamattarynyń Konstıtýsııada bekitilgen beıbit jáne qarýsyz jınalyp, pıketke shyǵý, jınalys, mıtıngiler, demonstrasııa jáne sherý ótkizý kezindegi týyndaıtyn qoǵamdyq qatynastardy retteýge baǵyttalǵanyn jetkizdi.
«Zańda beıbit jınalystardy uıymdastyrý jáne ótkizýdiń negizgi qaǵıdattary belgilengen. Olar birinshiden zańdylyq, beıbit jınalystarǵa azamattardyń qatysýynyń eriktiligi, beıbit jınalystar ótkizý kezinde kúsh qoldanbaý sıpatynda bolýy, beıbit jınalystardy ótkizý paıdasyna prezýmpsııasy jáne taraptardyń jaýapkershiligi, memlekettik qaýipsizdikti, qoǵamdyq tártipti, densaýlyq saqtaýdy, basqa adamdardyń quqyqtary men bostandyqtaryn qamtamasyz etýi», - dedi S.Eńsegenov.
Sonymen birge zań jobasynda beıbit jınalystar túrlerin ótkizýge qatysty erejeler belgilengen. Iаǵnı, pıketke shyǵý, jınalys jáne mıtıngi ótkizý úshin jergilikti atqarýshy organdardyń kelisimi qajet etilmeıdi. Beıbit nysanda ótetin sharalar boıynsha jergilikti atqarýshy organdarǵa habarlama ǵana joldanady. Al mıtıngi jáne sherý ótkizý úshin jergilikti atqarýshy organdarǵa kelisim alý úshin ótinish beriledi.
Senator zań jobasynda beıbit jınalystardy ótkizýge qatysty habarlama, ótinish berý jáne olardy qaraý merzimi naqtylanǵanyn aıta kelip, jergilikti ókildi organdar beıbit jınalystardy ótkizý úshin arnaıy oryn belgileýi qajet ekenin jáne ol oryndar eldi mekenderdiń shetinde emes, ortalyqtarynda bolýy zańda naqty jazylǵanyn habarlady.
S.Eńsegenov «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zań jobasyna qosymsha ilespe zań da daıyndalǵanyn atap ótti. «Ilespe zań qoldanystaǵy zańnamaǵa ózgerister men tolyqtyrýlar engizýdi kózdeıdi. Iаǵnı, 3 kodeks pen 8 zańǵa ózgerister engiziledi. Bul engiziletin ózgerister «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» zańda kózdelgen sharalardy iske asyrýǵa baǵyttalǵan», - dedi senator.
