Sonymen qatar halyqtyń shydamdylyǵyna, tártipke baǵynǵan ómirlerine, el amandyǵy men halyq keleshegine, onyń qaýipsizdigi úshin eren eńbek etip júrgen jandarǵa da – dárigerler men medısına qyzmetkerlerine, quqyq qorǵaý organdarynyń ókilderine jáne áskerı qyzmetshilerge alǵysyn bildirýi Prezıdenttiń óz tarapynan elge, halyqqa kórsetken erekshe qoldaýy retinde qabyldanýy tıis.
Prezıdent óz málimdemesinde «Biz qazirden bastap daǵdarystan keıingi kezeńge daıyndalýymyz kerek» degen ustanymǵa erekshe mán berdi. Daǵdarys árdaıym kez kelgen memleketke, mekemege, tipti jeke adamnyń ózine tolassyz múmkindik beredi. Daǵdarys – ol ósý, ol bir sapaly deńgeıden ekinshi sapaly jaǵdaıǵa aýysý múmkindigi. Bul múmkindikter nede?
Birinshiden, Prezıdent atap ótken memlekettik basqarý júıesi, ıaǵnı tıimdi memleket, tıimdi memlekettik apparat, tıimdi memlekettik qyzmet degen qundylyqtardy aıqyndaıdy. Aldyńǵy qatarǵa memlekettik apparat tıimdiligi shyǵady, ıaǵnı ózara árekettesý, sondaı-aq qoǵam men kommýnıkasııany jedeldetý ári ońtaılandyrý.
Ekinshiden, dástúrli ózara árekettesý belsendiligi tómendeýi saldarynan onlaın árekettesý belsendi túrde damıdy. Bul bilim berý, saýda, medısına, memlekettik qyzmet kórsetý sııaqty salalarda erekshe aıqyn kórinis tabady. Jańa bıznes úlgiler, prınsıpter, normalar paıda bolýy múmkin, tipti halyqtyń tutyný sıpaty da ózgerýi múmkin.
Úshinshiden, COVID-19 indeti búginde tipti saılaý prosesterine de úlken ózgerister ákelýde. Sol sebepti saılaý prosesin uıymdastyrýdy jetildirý jaǵynan da múmkindikter mol. Mysaly, Ońtústik Koreıa pandemııa jaǵdaıyna qaramastan, óz elinde parlamenttik saılaýdy ótkizdi, ıaǵnı kez kelgen úrdisti beıimdeýge ári ózgertýge bolady degen sóz.
Tórtinshiden, tótenshe jaǵdaı qoǵamda sıfrly saýattylyq, sıfrlandyrý máselesiniń ózektiligin erekshe kórsetti. Bul tótenshe jaǵdaı memlekettiń birqatar salasynda, ásirese bilim, áleýmettik, eńbek, qarjy, tipti oıyn-saýyq ındýstrııasynyń ózinde sıfrly tehnologııalardy damytý múmkindigin berip otyrǵanyn kórip otyrmyz. Sol arqyly, halyqtyń tehnologııalardy paıdalaný deńgeıi kúrt ósedi dep boljaýǵa bolady. Al tehnologııa árdaıym ashyqtyq ári transparenttilik qaǵıdattarynyń júzege asýyna erekshe serpin beredi.
Besinshiden, tótenshe jaǵdaıda eriktiler, azamattyq belsendiler halyqqa erekshe kómektesýde. Bul da bizdiń el úshin úlken múmkindik, osyndaı azamattyq bastamalar legin ári qaraı jalǵastyrý arqyly memleket azamattardyń eline, jerine, eldi mekenine degen jaýapkershilik sezimin de uıalatady. Qazaqstannyń ómirlik ustanymy bolǵan birlik ári yntymaq degen túsinik el úshin de, memleket úshin de aıryqsha mánge ıe bolýy múmkin.
Prezıdent aıtyp ótkendeı, «kemshilikterdi biz kórip otyrmyz. Odan tıisti sabaq alyp, qajetti sharalardy qabyldaımyz», ıaǵnı ustanymy bıik el retinde biz de pandemııa jaǵdaıynan óz sabaqtarymyz ben óz múmkindikterimizdi alatynymyz sózsiz.
Alýa JOLDYBALINA,
Prezıdent janyndaǵy Qazaqstan strategııalyq zertteýler ınstıtýtynyń bólim basshysy
