Qajymuqan aýylyndaǵy «Zerendi» eshki sharýashylyǵy tórt jyldan beri tabıǵı taza eshki sútin óndirip, tutynýshylaryna usynýda. Tańsyq asty talǵap ishetin kirpııaz tutynýshy da buryn emis-emis estigenimen, eshki súti tańdaıyna tımegendikten, alǵashqyda tosyrqaǵandary da ras. Keıin aǵzaǵa paıdasy týraly estigen soń suranys arta tústi.
Koronavırýs indeti adamdy ǵana emes, sharýashylyqtardy da qyryna alǵan. Indet ekpinine shydaı almaǵan keıbireýleri álsizdigin moıyndasa, bul sharýashylyq óndiris jelilerin qaıta jasaqtap, yqshamdalǵan kúıi jaǵalaryna jarmasqan qıyndyqqa tótep berýde. Negizgi qolbaılaý, daıyn ónimdi ótkizýdegi qıyndyq. Buryn eshki sútinen daıyndalǵan ónim Nur-Sultan, Almaty, Kókshetaý, Qaraǵandy, Jezqazǵan, Qostanaı qalalarynyń saýda sórelerine qoıylatyn edi.
– Amal joq, qazirdiń ózinde birshama shyǵynǵa batyp otyrmyz. – Basty qıynshylyq taýardy tutynýshyǵa jetkizý, – deıdi joba jetekshisi Azamat Turmaǵambetov.
Eshki fermasy Nur-Sultan qalasyn azyq-túlikpen qamtý beldeýine engen. Kásiporyn osy ýaqytqa deıin áleýmettik mańyzy bar nysandardy shıpasy mol taǵammen qamtamasyz etip keldi. Sút qadirin biletin jamaǵat epsekti jandar daıyndaǵan eshki sútimen sábılerdi de tamaqtandyrady.
Asyl tuqymdy eshki sharýashylyǵynda óndiris kólemi burynǵyǵa qaraǵanda azaıǵanymen, endi saqtaý merzimi uzaq ónim daıyndaýǵa kóbirek kóńil aýdaryp otyr. Sonda óndirgen ónimderi ysyrap bolmaıdy ǵoı. Ujym basshysynyń aıtýyna qaraǵanda, sharýashylyqty júrgizýdiń alǵysharty – tutynýshynyń kóńilinen shyǵý. Sondyqtan tapsyrysty ýaqytynda oryndap, el senimine ıe bolýǵa umtylady.
Búgingi tańda kásiporyn balmuzdaq shyǵarýdy qolǵa aldy. Oǵan qosa, maı, súzbe, irimshik, qurt ta óndiriledi. Halqymyzdyń san ǵasyr boıy aq dastarqanynan arylmaǵan ulttyq taǵamnyń qýaty indettiń betin qaıtarýǵa septesip jatsa, ǵanıbet emes pe?!
Aqmola oblysy,
Selınograd aýdany
