Nur-Sultan qalasyndaǵy «Rýhanı jańǵyrý» jobalyq keńsesi baǵdarlamany júzege asyrý boıynsha óziniń úsh jyldyq jumysyn qorytyndylady.
«Rýhanı jańǵyrý» baǵdarlamasy aıasynda qalada iske asyrylyp jatqan barlyq is-sharalardyń negizin jeke tulǵanyń damýy, ulttyq biregeılik pen halyqaralyq ustanym, memlekettiń, azamattyq qoǵamnyń jáne jergilikti qoǵamdastyqtardyń damýy jáne Qazaqstan Respýblıkasynyń Tuńǵysh Prezıdenti Nursultan Nazarbaev aıtqan alty basty qaǵıda: básekege qabilettilik, pragmatızm, ulttyq biregeılikti saqtaý, Qazaqstannyń revolıýsııalyq emes, evolıýsııalyq damýy, bilim kýlti, sananyń ashyqtyǵy quraıdy.
2017-2020 jyldary 3 mıllıonnan astam adamdy qamtıtyn 718 is-shara ótkizildi (onlaın oqytý, master klasstar). Elbasynyń baǵdarlamalyq maqalasynyń negizgi baǵyttary boıynsha jumysty úılestirý maqsatynda elordada halyqty keńinen tartýǵa baǵyttalǵan aýqymdy jobalardy iske asyratyn «Rýhanı jańǵyrý» jobalyq keńsesi quryldy.
2019 jyly «Rýhanı jańǵyrý» jobalyq keńsesiniń bazasynda «Rýhanı jańǵyrý» bilim berý ortalyǵy quryldy. Onda baǵdarlamanyń negizgi baǵyttary boıynsha qazaqstandyq professorlar men qoǵam qaıratkerleri tegin dárister ótkizedi.
Baǵdarlamany tıimdi iske asyrý maqsatynda 2018 jyldyń 3 qańtarynan bastap sarapshylyq keńes bekitildi. Oǵan shyǵarmashylyq jáne ǵylymı ıntellıgensııa, joǵary oqý oryndary, saıası partııalar, qoǵam qaıratkerleri ókilderinen 33 sarapshy qatysady.
27 sáýirde Nur-Sultan qalalyq «Rýhanı jańǵyrý» jobalyq keńsesiniń dırektory Aqerke Jumanbaeva Aqparat jáne qoǵamdyq damý mınıstrliginiń «Rýhanı Jańǵyrý» baǵdarlamasyn úılestirý departamentiniń dırektory Nurlan Kúntýovpen onlaın-suhbat ótkizdi. Kezdesý barysynda «Rýhanı jańǵyrý» baǵdarlamasyn júzege asyrý boıynsha 2020 jylǵa arnalǵan josparlar talqylandy. Sonymen qatar úsh jyl ishindegi jumys nátıjeleri jáne karantın kezinde júrgiziletin jumystar aıtyldy.
Aıta ketý kerek, karantın bastalǵannan beri Nur-Sultan qalasy boıynsha «Rýhanı jańǵyrý» jobalyq keńsesi uıymdastyrǵan onlaın is-sharalarǵa 300 myńnan astam adam qatysty.
2017 jyldyń 12 sáýirinde QR Tuńǵysh Prezıdenti N. Á. Nazarbaevtyń «Rýhanı jańǵyrý» maqalasy jaryq kórdi. Búgingi tańda jobalyq keńse baǵdarlamalyq maqalanyń 6 negizgi baǵyty boıynsha 13 arnaıy jobany iske asyrýda.
