Atalǵan zań jobasy «Áleýmettik-ekonomıkalyq turaqtylyqty qamtamasyz etý jónindegi sharalar týraly» 2020 jylǵy 16 naýryzdaǵy Memleket basshysynyń Jarlyǵyn oryndaý maqsatynda ázirlendi. Qujat áleýmettik-ekonomıkalyq turaqtylyqty qamtamasyz etý úshin tótenshe jaǵdaı kezeńinde jedel sharalar qabyldaý múmkindigin kúsheıtýdi kózdeıdi.
Zań jobasyn depýtattar nazaryna Ulttyq ekonomıka mınıstri Rýslan Dálenov usyndy.
–Zań jobasynda tótenshe jaǵdaı kezeńinde memlekettik basqarýdyń jumys isteý mehanızmi belgilenedi. Ol úshin «Tótenshe jaǵdaı týraly» jáne «Quqyqtyq aktiler týraly» zańdarǵa túzetýler engiziledi. Atap aıtqanda, «Tótenshe jaǵdaı týraly» Zań tótenshe jaǵdaı kezeńinde zańnamanyń jekelegen salalarynyń qoldanylý erekshelikterimen tolyqtyrylady. Zań jobasynda olarǵa 14 sala jatqyzylady: salyqtyq, bıýdjettik, kedendik, banktik, eńbek, monopolııaǵa qarsy zańnama; densaýlyq, memlekettik satyp alý, valıýtalyq retteý týraly zańnama; áleýmettik qorǵaý, memlekettik múlik, memlekettik baqylaý jáne qadaǵalaý salasynda; sondaı-aq eldiń halyqaralyq mindettemelerin iske asyrý, – dedi R.Dálenov.
Mınıstrdiń aıtýynsha, tótenshe jaǵdaı kezinde qabyldanǵan quqyqtyq aktiler bul kezeń aıaqtalǵanǵa deıin qoldanylady. Olardyń qataryna ózge qoldanylý merzimi belgilengen aktiler kirmeıdi.
