Qazir qala kósheleri, kóp qabatty turǵyn úı kireberisteri men Qazposhta, bankterdiń halyqqa qyzmet kórsetý oryndary, Áýelbekov, Abaı, Shaqshaq Jánibek kósheleri kúndelikti dezınfeksııalaýdan ótip turady. Dezınfeksııa forbısıd suıyq eritindisin qoldana otyryp, arnaıy qurylǵy kómegimen jasalady.
Qalada 9 adam karantındik bólimshede jatyr. Olardyń bireýi Reseıden kelgen, 8-i naýqaspen baılanysta bolǵandar.
Arqalyq óńirlik aýrýhanasynyń provızorlyq bólimshesinde sýyq tıip, tumaýratyp qalǵan 2 adam jatyr. 95 adamnan qolhat alynyp, óz úılerine oqshaýlanǵan. Olar polısııa qyzmetkerleriniń baqylaýynda.
Qazir qala aýmaǵynda úsh tosqaýyl beketi qoıylǵan. Bul beketterde 137 polısııa qyzmetkeri eki aýysymdy rejimde qyzmet atqaryp jatyr.
Qalada qoǵamdyq kólik pen taksı múldem júrmeıdi. Tek qyzmettik, kommýnaldyq qyzmetterge, iri kásiporyndarǵa tıesili 386 avtokólikke, 159 kásipker kóligine, 318 aýylsharýashylyq tehnıkasyna, sondaı-aq 105 tulǵaǵa ruqsat etilgen.
Búginge deıin reıdtik is-sharalar barysynda 61 ákimshilik quqyq buzýshylyq (tótenshe jaǵdaı rejımin buzý) anyqtaldy. 24 turǵynǵa aıyppul salynyp, 9 adam qamaý túrindegi ákimshilik jaýapkershilikke tartyldy.
Birinshi kezekte qajetti azyq-túlik alý úshin az qamtylǵandar qatarynan 1000 adamnan turatyn tizim jasaldy. Qala kásipkerleri úı karantınindegi 9 otbasyn tegin azyq-túlikpen qamtamasyz etedi.
Arqalyq qalasynyń volonterlik toby da biraz sharýa tyndyryp jatyr. Eriktiler jalǵyz basty jáne qart adamdarǵa kómek kórsetýde, bank jáne Qazposhta bólimsheleri klıentteriniń sanıtarlyq qaýipsizdik talaptaryn saqtaýyn uıymdastyrý jumystaryna qatysýda.
Turǵyndar qala tynysy týraly jergilikti teledıdar efıri men áleýmettik jeliler arqyly kúndelikti habar alyp otyr.
О́ńirlik jedel shtabtyń málimetinshe, qala aýmaǵyndaǵy halyqqa birinshi kezekte qajet taýarlar baǵasy baqylaýda. Azyq-túlik tapshylyǵy joq. Jaǵdaı turaqty.
Qostanaı oblysy
