Ásirese, áleýmettik mańyzy bar taýarlardyń baǵasy shektik normadan asyp ketpeýi tıis. Karantındi syltaýratyp, saýdagerler qarapaıym halyqtyń qaltasyn qaqpaýy qajet.
Karantın bastalǵaly jylqy eti men sıyr etiniń kelisi 300-400 teńgege qymbattady. El ishinde soıystyq mal bar bolǵanymen sharýalar oblys ortalyǵyndaǵy saýda sórelerine jetkize almaı jatyr. Tipti, jumyrtqadan jún qyrqatyn deldaldardyń da dymy quryp otyr. Aıtýlaryna qaraǵanda, et tasýǵa ruqsat alǵandarymen kópshiliginiń muzdatqyshpen jabdyqtalǵan kólikteri joq eken. Sol sebepti, bul ýaqytsha qymbatshylyq dep uqtyq. Satýshylar et, makaron baǵalaryn shektik normada turaqty ustap tur. Al jumyrtqa, qaraqumyq qymbattaý. Bular úkimet bekitken áleýmettik mańyzy bar azyq-túlikke jatady.
Saýda sórelerindegi: makaron – 215, qaraqumyq – 339, tazartylǵan kúrish – 307, jumyrtqa – 267, ósimdik maıy – 417 teńge kóleminde. Basqa taýarlardyń baǵasy qatań baqylanbasa da, mundaı taýarlar árdaıym qadaǵalanady.
–Búginde qala bazarlaryndaǵy áleýmettik mańyzy bar 19 túrli taýarǵa monıtorıng júrgizilip otyrady. Onyń ishindegi toǵyz túri úshin shektik baǵa bekitilgen. Atalmysh taýarlary boıynsha qalalyq ákimdik mamandary baqylaýlar júrgizip, talapty buzǵan saýdagerlerge ákimshilik quqyqbuzýshylyq boıynsha hattama toltyrady. Biz Ortalyq bazar, Rýbın, Krıstall, Smoll, Soıýz syndy iri saýda nysandaryndaǵy taýarlar baǵasyn baqylaımyz. Qala boıynsha 515 irili-usaqty saýda nysanyna tekserý jasalady. Sońǵy eki kúnde baǵany turaqty ustamaǵany úshin 13 eskertpe hattama toltyryldy. Alǵashqy eskertýden keıin mundaı zań buzýshylyqty qaıtalaǵan saýdagerge 100 aılyq eseptik kórsetkish kóleminde aıyppul salynady,–deıdi qalalyq kásipkerlik bóliminiń jetekshisi Andreı Podgýrskıı.
Azyq-túliktiń baǵasyna alańdap otyrǵan halyqtyń qamyn oılaǵan da jaqsy-aý.
Kókshetaý qalasy
