Atalǵan zań jobasyn tanystyrǵan Eńbek jáne halyqty áleýmettik qorǵaý mınıstri Birjan Nurymbetov zań jobasyn qabyldaýdyń mindeti kóshi-qon zańnamasyn jetildirý ekenin atap ótti. Onyń ishinde elimizge keletin etnıkalyq repatrıanttar men qonys aýdarýshylarǵa qolaıly jaǵdaılar jasaý, el ekonomıkasynyń suranystaryna arnalǵan syrtqy eńbek kóshi-qonynyń tıimdi júıesin qurý, qolaıly ınvestısııalyq ahýal jasaý, halyqaralyq úzdik tájirıbeni eskere otyryp kóshi-qon prosesterin retteý salasyndaǵy quqyqtyq bazany keńeıtý jáne zańsyz kóshi-qonnyń jolyn kesý baǵyttary bar.
Kóshi-qondy retteýdi kózdeıtin qujatta Memleket basshysy Qasym-Jomart Toqaevtyń tapsyrmasy boıynsha «oralman» sózin «qandas» sózine aýystyrý týraly túzetý engizildi.
– Etnıkalyq kóshi-qon salasyna qandaı ózgerister engiziledi? Birinshiden, qoldanystaǵy zańnamaǵa sáıkes, etnıkalyq qazaqtar «oralman» mártebesin alý úshin Qazaqstan Respýblıkasynyń táýelsizdik alǵanǵa deıin shet memlekettiń aýmaǵynda turý faktisin rastaý qajet. Is júzinde 1991 jyldan keıin týǵan etnıkalyq qazaqtar mundaı qujattardy bere almaıdy. Osyǵan baılanysty, «oralman» mártebesin alý úshin buryn Qazaqstan Respýblıkasynyń azamattyǵynda bolmaýy negizgi krıterııi retinde engiziledi, – dedi B.Nurymbetov.
