Tótenshe jaǵdaı kezindegi máselelerdi keńinen sóz etken Darıǵa Nazarbaeva medısına salasyn damytýǵa arnaıy toqtalyp, Memleket basshysy Qasym-Jomart Toqaevtyń sheshimimen bul sala aýqymdy memlekettik qoldaýǵa ıe bolatynyn atap ótti.
– Prezıdent halyqtyń densaýlyǵyn qorǵaý júıesin jaqsartý jónindegi naqty usynystardy qarastyra otyryp, halyq densaýlyǵy men densaýlyq saqtaý júıesi týraly jańa Kodeks qabyldaýdy tapsyrdy. Osy asa mańyzdy qujatpen biz jaqyn arada jumysty bastaımyz. Jańa Kodekstiń jobasymen jumys isteý kezinde senatorlar osy salanyń tótenshe jaǵdaı kezindegi problemalyq máselelerin eskergeni durys dep sanaımyn. Bul tusta taǵy qandaı máselege nazar aýdarǵan oryndy? Pandemııa qoǵamnyń artyqshylyqtary men damý qundylyqtaryn túbegeıli ózgertti. Azamattardyń ómiri men densaýlyǵyn saqtaý árqashan memlekettik saıasattyń negizgi máselesi bolyp kelgen, biraq bul mindet qazirgideı ótkir bolǵan emes. Osydan kelip barsha qoǵam elimizdegi medısınany damytý strategııasyna aıryqsha nazar aýdaryp otyr, – dedi Senat Tóraǵasy.
Darıǵa Nazarbaeva elimizdiń júıe qalyptastyrýshy kásiporyndar tiziminiń jobasyn shyqqanyn aıta kelip, onyń ishinde medısınalyq maska nemese dezınfeksııa quraldaryn shyǵaratyn tym bolmaǵanda bir kásiporyn bolmaǵanyna mán berdi. Osy rette ol ortaǵa «Prezıdenttiń tapsyrmasy boıynsha otandyq test-júıelerin, ımmýndy bıologııalyq preparattardy óndiretin, koronovırýs ınfeksııasyna qarsy vaksına shyǵarýǵa daıyn kásiporyndar qaıda?» degen suraq tastady?
Darıǵa Nazarbaeva qysyltaıań kezeńniń basqa da máselelerine toqtalyp, sóziniń sońynda Parlament barlyq deńgeıdegi bılik organdarynyń tótenshe jaǵdaıdaǵy áreketterine egjeı-tegjeıli taldaý júrgizip, júıeli qorytyndy shyǵarý kerek ekenin atap ótti.
