Oqıǵa Rıdder qalasynda 20 sáýir kúni bolǵan. Bul jóninde polısııa qyzmetkerleri egjeı-tegjeıli jarııa etip aıtpaǵan. Olardyń jasaǵan erligin balalardyń ata-analary habarlaǵan.
Tańǵy saǵat 5.00 shamasynda qalalyq polısııa bóliminiń jedel ýákili Internasıonalnyı kóshesindegi úılerdiń biriniń aýlasynda sharýashylyq jaılardan órt shyqqanyn baıqap qalady. Tez arada jalyn sharpyǵan turǵyn úıge jetip kelgen polısııa qyzmetkeriniń aldynan úreılengen áıel júgirip shyǵyp, úıde kishkene balalarynyń baryn habarlaıdy.
Jedel áreket etken polıseı Ivan Nazarov janyp jatqan ǵımaratqa kirip, úsh balany evakýasııalaǵan. Balalar úı ishin tútin basyp, kóz aldy tumandanǵanyna qaramastan, anasy sıpattaǵan bólmeni taýyp, uıqyda jatqan. Saqshy olardy kórpege orap, tysqa alyp shyǵady.
«Polısııa qyzmetkeriniń jınaqy, durys, ári ýaqtyly áreketteri bizdiń otbasymyzdy qutqarýǵa kómektesti. Sondaı-aq ol órttiń kórshiles úılerge taratylýynyń aldyn alýǵa kómektesti. Biz Ivan Nazarovqa óte rızamyz» deıdi Rıdder qalasynyń turǵyny Galına Kolesnıkova.
Qazirgi tańda polısııa qyzmetkerleri turǵyndarǵa órt kezinde joǵalǵan qujattardy qalpyna keltirýge kómektesip jatyr.
Bul Rıdder qalasy polıseıleriniń erligimen erekshelengen jalǵyz jaǵdaı emes. 22 sáýirde Poperechnoe aýylynyń ýchaskelik ınspektory óz betinshe sharýashylyq jaılardan shyqqan órttiń kózin joıdy. О́rtti kórgen polıseı Meıirim Aztaev oılanbastan kómekke júgirip kelip, arnaıy quraldarmen otty sóndirýge kirisken.
«Meıirim Aztaev lezde qudyqqa shlangi tyǵyp, sorǵyny ornatty. Dál kóz aldymda qorshaýǵa kirip, órtti sóndire bastady. Polısııa qyzmetkeri bir ózi órtti aýyzdyqtady» deıdi aýyl turǵyny Malıka Djamalhanova.
Ýchaskelik polısııa ınspektorynyń jedel áreketi arqasynda iri órtke jaqyn turǵyn úıler, jaılar, pishen saraıy órtten aman qaldy. Rıdder qalasynyń turǵyndary polıseılerdiń kásibıligin joǵary baǵalady.
