Atalǵan qujatty tanystyrǵan Májilis depýtaty Azat Perýashev zań jobasy Prezıdent Qasym-Jomart Toqaevtyń Ulttyq qoǵamdyq senim keńesinde parlamenttik oppozısııa ınstıtýtyn zańnamalyq turǵydan bekitý tapsyrmasyna sáıkes daıyndalǵanyn aıtty.
– Memleket basshysynyń tapsyrmasy boıynsha «Aq jol» demokratııalyq partııasy aldyn ala daıyndaǵan parlamenttik oppozısııa týraly zań jobasyn qazirgi jaǵdaıdyń talaptaryna sáıkes qaıta jańartty. Zań jobasy fraksııa depýtattarynyń saparlary barysynda jergilikti jáne ulttyq deńgeıde saılaýshylardyń, ǵalymdardyń jáne saıası qoǵam ókilderiniń talqylaýynan ótti. Talqylaý jumystary BAQ betterinde jarııalandy. Mysaly, qańtar aıynda «Habar» arnasynda tikeleı efırde bir saǵattyq pikir almasý ótse, sáýirde táýelsiz ınternet resýrstarynda sheteldik sarapshylardyń qatysýymen taǵy da eki tikeleı efır ótip, zań jobasyna qoldaý kórsetildi. Biz ózimizdi usynystardy «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýsııalyq zańyna tolyqtyrýlar engizý týraly», sondaı-aq «Qazaqstan Respýblıkasynyń keıbir zańnamalyq aktilerine parlamenttik oppozısııa máseleleri boıynsha ózgeris pen tolyqtyrýlar engizý týraly» eki zań jobasyna bóldik, - dedi Azat Perýashev.
