Bıbinur Ahmetqyzy qazaqtyń bulbuly atanǵan jeztańdaı ánshi, KSRO halyq ártisi, Sosıalıstik Eńbek Eri, KSRO Memlekettik syılyǵynyń laýreaty Bıbigúl Tólegenovanyń ápkesi. Ardagerdiń nemeresi Tomırıs Saǵyndyq Halyqaralyq mekteptiń 7 synybynda bilim alady.
«Qaıran bizdiń analar ardy oılaǵan» dep aqıyq aqyn Muqaǵalı jyrlaǵandaı, soǵys jyldarynda er-azamattyń qaıratyn qajet etetin «qara jumysta» boı jazbastan eńbek etip, azamattardy joqtatpaǵan qaısar analarymyzdyń taptyrmas úlgisi – Bıbinur Ahmetqyzy surapyl soǵys jyldary jaıynda syr shertti.
– Soǵys bastalǵan tusta men nebari 12-13 jastyń shamasynda edim. Balalyǵymyz qara halyqtyń basyna tóngen qıynshylyqpen bastaldy. Jıyrma bes jasynda shıetteı bala-shaǵamen jesir qalǵan anam, sol aýyrtpalyqty jalǵyz ózi kóterdi. Joqshylyǵy men ashtyǵy qatar kelgen zamannyń beınetin jastyqpen kóterdik. Eńbek ortasyna erte aralastyq. Sińlim Bıbigúl aǵash óńdeıtin zaýytqa jumysqa turdy. Jaramsyz qaldyqtardy jınap, úıge ákeletinbiz. Bar oıymyz otyn etip jaǵyp, baýyrlarymyzben birge jylyný ǵoı. Áskerı gospıtaldiń jumysyna da aralasqan shaǵymyz boldy. Men jaýyngerlerge hat jazýǵa kómektessem, sińlim Bıbigúl án salyp beretin. Sol ýaqytta Bıbigúldi «Katıýsha» dep te atap ketken. Sol kúnderdi oı eleginen ótkizsem, qýanyshy az bolǵan eken ǵoı», – dep kúrsinedi qart ana.
Bıbinur Ahmetqyzynyń áńgimesin zeıin qoıyp tyńdaǵan oqýshylar, qarshadaıynan soǵys dalasyn kórgen qart ájeıdiń jabyrqaýly kóńilin baıqasa kerek, áńgimeniń barysyn ózge arnaǵa buryp, jeńisti jaqyndatqan barsha ardagerlerge alǵystaryn bildirdi.
– Bolashaq urpaqqa beıbit kún syılaǵan ardagerlerimizdiń esimi bizdeı óskeleń urpaqtyń jadynda máńgilikke saqtalady. Erlikterińiz áli talaı urpaqqa ańyz bolyp aıtylyp júreri sózsiz. Erlikterińizdi qurmetteý, esimderińizdi ulyqtaý – bizge tapsyrylǵan úlken amanat, – dedi oqýshylar biraýyzdan.
– Búgingideı qıyn-qystaý ýaqytqa qaramastan, balalardyń bizderdi esterinen shyǵarmaı, ǵalamtor arqyly júzdesýge, tildesýge shaqyrǵany qatty qýantty. Oqýshylardyń jarqyn júzderi men móldiregen kózderin kórip, beıbit kúnniń qýanyshy arta berýin tileımin», – dep keıipkerimiz aǵynan jaryldy.
Onlaın kezdesýdiń sońynda balalar tyl ardageri Bıbinur Ahmetqyzymen halyq áni «Qusnı-Qorlandy» oryndady. Kúmis kómeı daýys ápkeli-sińlili Bıbinur men Bıbigúl analarymyzdyń boıyna daryǵan, qanyna sińgen asyl qasıet degen oıǵa qaldyq.
