Bıyl kúzde 58 jasqa tolǵaly otyrǵan Evanderdiń de sportyq mansabynda jarqyn jeńister az bolǵan joq. 1983 jyly Panamerıka oıyndarynda kúmis jáne 1984 jyly Los-Andjeles Olımpıadasynda qola medaldi ıelengen AQSh-tyń Alabama shtatynyń týmasy ǵalamdyq doda aıaqtalǵan bette kásipqoı rıngtke kúsh synasýǵa bel býdy. 27 jylǵa jýyq ýaqyt boıy judyryqtasqan Holıfıld 57 kezdesý ótkizip, 44 ret jeńiske jetti. 29 qarsylasyn nokaýtqa jiberdi. 10 márte utyldy. Eki ret teń túsip, taǵy bir básekeniń nátıjesi esepke alynǵan joq. Ol birinshi aýyr jáne asa aýyr salmaqta birneshe márte eń beldi nusqalar boıynsha álem chempıony jáne absolıýtti chempıon ataǵyn ıelendi. Evander 49 jasqa kelgen shaǵynda ǵana bylǵary qolǵabyn shegege ildi.
Atyshýly Maık Taısonmen Evander Holıfıldtiń joly eki márte qıysty. 1996 jyldyń 9 qarashasynda ótken báseke 11 raýndta toqtatyldy. Evander Maıkty qarsylasyn aýyr soqqylardyń astyna alǵannan soń tóreshi arasha tústi. 1997 jyldyń 29 shildesinde Holıfıldiń qulaǵyn eki ret ońdyrmaı tistegeni úshin Taıson rıngten qýyldy.
