Ustalǵan keme Qazaqstan Respýblıkasy aýmaqtyq sýlarynan tabyldy. Shekarany buzýshylar shekara kateri ekıpajynyń halyqaralyq teńiz zańnamasyna sáıkes kemeni toqtatý týraly talaptaryna qaramastan tıisti jaýap qaıtarmaı, memlekettik shekara kateriniń aldynda soqtyǵysýǵa qaýip tóndire otyryp, úlken jyldamdyqta qaýipti manevr jasaǵan.
Shekara buzýshylaryn qýý 1 saǵat 40 mınýtqa sozylyp, nátıjesinde «Qazaqstan Respýblıkasy Memlekettik shekarasy týraly» Zańnyń talaptaryna sáıkes kemeni májbúrlep toqtatý úshin shekarashylar qarý qoldanǵan. Osylaısha, qarýdan aýaǵa 25 eskertý, 87 ret júrý baǵyty boıynsha jáne 185 ret shekara buzýshylardyń keme qozǵaltqyshtary boıynsha oq atyldy.
Qarýdy qoldaný saldarynan úsh quqyq buzýshy jaraqat aldy. Ustaý kezinde zardap shekkenderge dereý alǵashqy medısınalyq kómek kórsetildi. Qabyldanǵan sharalarǵa qaramastan, jaǵaǵa kelgen kezde jedel járdem dárigerlerimen ustalǵan adamdardyń biriniń qaıtys bolǵany anyqtaldy.
Qazirgi tańda Qazaqstan Respýblıkasy quzyretti organdary ustalǵandarǵa qatysty QR Qylmystyq kodeksiniń 392-baby 1-bóligine sáıkes memlekettik shekarany buzý faktisi boıynsha tergeý is-sharalaryn júrgizýde.
QR UQK ShQ habarlaǵandaı, ustalǵan tórt brakonerdiń úsheýi 2017 jyly ispettes tártip buzǵany úshin Qazaqstan zańnamasyna sáıkes 6 aıǵa bas bostandyǵynan aıyrylǵan.
Qazaqstan tarapy qaza tapqan Ázerbaıjan azamatynyń otbasyna kóńil aıtady. Búgin tańerteń qaza tapqan adamnyń denesi Ázerbaıjan tarapyna berildi.
Bul oqıǵa týraly tolyq aqparat Ázerbaıjan tarapyna jiberildi.
Qazaqstan tarapy Ázerbaıjan azamattarynyń Qazaqstan Memlekettik shekarasyn buzý faktileriniń jıilenýine alańdaýshylyq bildiredi. 2017 jyldan bastap qazirgi ýaqytqa deıin 41 ÁR azamaty ustaldy, onyń 33-i Qazaqstan Memlekettik shekarasyn buzǵany úshin sottaldy.
