«Qurmetti dostar!
Barshańyzdy Otan qorǵaýshy kúnimen quttyqtaımyn.
Osydan 28 jyl buryn Elbasymyz Qarýly Kúshterimizdi quryp, egemen elimizdiń berik qalqanyn qalyptastyrdy. Sondyqtan bul mereke táýelsiz Qazaqstannyń abyroıyn asqaqtatyp, erlik pen eldikti dáripteıdi.
Qazirgi tańda aıbyndy armııamyz elimizdiń tynyshtyǵy men turaqtylyǵynyń basty kepili sanalady. Osy jolda sap túzegen sarbazdarymyz Otanǵa adal qyzmet etýdiń ozyq úlgisin kórsetip keledi. Biz batyr babalarymyzdyń dańqty jolyn laıyqty jalǵaı bilgen ulandarymyzdy árdaıym maqtan tutamyz.
Búgingideı kúrdeli kezeńde de áskerı qyzmetshiler, sonyń ishinde arnaýly jıyndarǵa shaqyrylǵan azamattar indetpen kúrestiń aldyńǵy shebinde júr. Memleket basshysy óz quttyqtaýynda atap ótkendeı, olardyń eren eńbegi - shynaıy patrıotızmniń jarqyn kórinisi.
Qarýly Kúshterimizdiń áleýeti arta bersin! Armııamyz aıbyndy, qorǵanysymyz qýatty bolyp, Qazaq eli máńgi jasasyn!» dep jazdy ol.
