Burynnan bizdiń osy máselege qatysty óz oıymyz bar. Arhıvterdiń barlyǵyn Mádenıet jáne sport mınıstrligine baǵyndyrý - baryp turǵan saýatsyzdyqtyń kórinisi dep oılaımyz. Bizdiń oıymyzsha, Qazaqstan Úkimetiniń janynan tikeleı Premer-Mınıstr men Úkimet apparatyna tikeleı baǵynatyn Qazaqstan Respýblıkasynyń ARHIV BASQARMASY qurylýy tıis. Arhıv basqarmasynyń basshysynda arnaıy bilim bolýy tıis. Kezinde, Hasanaev Marat Jaqsybaıuly syndy myqty arhıv mamany bolǵan edi. Sondaı myqty mamandardyń biri bul salany basqarsa quba-qup bolar edi.
Ekinshiden, arhıvterdegi búkil qujatty bas joq, kóz joq sıfrlandyrý durys emes! Ol úlken shyǵyn. Sebebi, mazmuny bir nemese kóshirme qujattar óte kóp qaıtalanady. Bizdiń oıymyzsha, árbir arhıv janynan arnaıy komıssııalar qurylyp, sol komıssııalar sheshimimen qujattardy sıfrlandyrǵan jón.
Úshinshiden, arhıvterdegi qujattardy jappaı sıfrlandyrýǵa ushan-teńiz aqsha jibergenshe, qajetti qujattardy basyp-shyǵarý jáne jarııalaýǵa da mańyz bergen jón. Mysaly, Prezıdent arhıvindegi Kırorgbıýro - Kırbıýro - Kırobkom - Kırkraıkom - Kazkraıkom - SK KPK qujattaryn baspadan basyp shyǵaratyn kez jetti dep esepteımiz. Bıýro men sekretarıat májilisteriniń hattamalaryn Reseıdegideı basyp shyǵarý asa qajet! Sonymen qatar, partkonferensııalar men sezderdiń stenografııalyq esepteri men olarǵa daıyndalǵan eseptik materıaldar jınaqtaryn, plenýmdardyń stenografııalyq esepteri men qaýlylaryn, materıaldar jınaǵyn túgel shyǵaratyn kez jetti. Aqshany osy salaǵa jibergen jón dep esepteımiz. Sol sııaqty, Ortalyq memlekettik arhıvtegi QazOAK pen Qazhalkom hattamalaryn túgel basyp shyǵaryp, kitaphanalarǵa taratqan jón. Sondaı QazaqAKSR Keńesterin sezderiniń, QazOAK sessııalarynyń, Qazaqstan Joǵarǵy Keńesi men onyń sessııalarynyń stenografııalyq esepteri men olarǵa daıyndalǵan materıaldardy, qaýly-qararlary men sheshimderin túgel basyp shyǵarý qajet dep esepteımiz.
Mine osyndaı jumystar ult tarıhyn tanýdyń jańa belesine jol ashyp, arhıv qujattaryn sıfrlandyrýdyń jarqyn úlgisi bolmaq dep oılaımyz. О́ıtkeni, bizdiń Qazaqstan arhıvterindegi jarııalaý bólimderiniń jumysy óte álsiz. Arhıv qujattaryn jarııalaýdy óz deńgeıine kóterý kerek dep oılaımyz.
«Torǵaı soısa da, qasapshy soısyn!» deıtin prınsıpti ustansaq, 1997-98 jyldary kóterilip, áli kúnge oryndalmaı kele jatqan «KÁSIPQOI MEMLEKET» qurý maqsatyna jaqyndaı túser edik.
Sábıt ShILDEBAI
