Shyndyǵyn aıtqanda, osy bir túıtkil másele kópten beri sheshimin tappaı jatqan bolatyn. Qazaqta «qarnymnyń ashqanyna emes, qadirimniń qashqanyna jylaımyn» degen sóz bar. Qadirimiz qashqan soń qaharman eńbek dástúrin jalǵastyrýǵa shynaıy septigin tıgizetin, jas urpaqty jasampaz eńbekke baýlıtyn ónege bolý kerektigin aıtyp talaı ret másele kóterdik. Qarnymyz ashqandyqtan emes, biz asarymyzdy asap, jasarymyzdy jasaǵan adamdarmyz. Bizdiń jasymyzdaǵy adamdarǵa kóp baılyqtyń qajeti de joq. Bizdiń jınaǵan baılyǵymyz – nátıjeli eńbek, jalqynyń emes, jalpynyń ıgiligi ǵoı.
Qazirgi urpaq ardagerler eńbeginiń zeınetin kórmeı jatqandyǵyn baıqasa, olar qalaı aq adal eńbekke yntyzar bolady. Eseli eńbek etýge degen qushtarlyq qaıdan paıda bolady? Sabaqtastyq bolýy kerek qoı. Munyń ózi tárbıeniń bir tetigi. Qolymyz jetpeı, sózimiz ótpeı júrgen ózekti máseleni el gazeti – «Egemen Qazaqstan» ústimizdegi jyldyń 6-shy aqpan kúngi nómirinde jaryq kórgen jýrnalıst Baıqal Baıádildiń «Erden erdiń nesi kem?» dep atalatyn maqalasynda oryndy kótergen edi. Sosıalıstik Eńbek Erleriniń jankeshti eńbegin qaýzap jazyp, olarǵa Qazaqstannyń Eńbek Eri ataǵyn alǵan adamdarmen birdeı arnaýly memlekettik járdemaqy tólený kerektigin jerine jetkize aıtqan bolatyn.
Onsyz da qatary seldirep qalǵan Sosıalıstik Eńbek Erleriniń kókeılerinde júrgen ókpe-naz tarqap, búginde laıyqty baǵasyn alyp otyr. Bul jalǵyz bizge ǵana emes, tabany tastan taımaǵan tarlanbozdaı ýaqytpen sanaspaı eńbek etip, ortaq baılyqty eseleı molaıtqan barsha ardagerlerge kórsetilgen qurmet dep bilemiz.
«Ardagerler týraly» zańda naqty bylaı dep kórsetilgen. «Sosıalıstik Eńbek Eri» ataǵyna jáne úsh dárejeli «Eńbek Dańqy» ordenderine ıe bolǵan adamdarǵa beriletin arnaýly memlekettik járdemaqy mólsheri «Keńes Odaǵynyń Batyry», «Halyq Qaharmany», «Qazaqstannyń Eńbek Eri» ataqtaryn alǵan adamdardikimen teńestirilip, 138,63 aılyq eseptik kórsetkish, ıaǵnı 385 115 teńge bolyp belgilenip otyr. Bul sheshim biz úshin ádildiktiń saltanat qurǵan sáti dep túısinemiz. Qazaqtyń jalpaq tilimen aıtqanda, «aq túıeniń qarny jarylǵan sát». Olaı deıtinim, osyǵan deıin Sosıalıstik Eńbek Erleri men III dárejeli «Eńbek Dańqy» ordenderiniń tolyq ıegerleri 9,60 aılyq eseptik kórsetkish nemese 26 668 teńge mólsherinde ǵana arnaýly memlekettik járdemaqy alyp keldi.
Bálkim, másele aqshada da emes shyǵar. Eń bastysy, eńbektiń elengeni. Táýelsiz qazaq elinde eńbek adamyn qurmetteý týraly az aıtylyp kele jatqan joq. Tuńǵysh Prezıdentimiz Nursultan Nazarbaev ta bul másele týraly talaı ret ataly sózin aıtqan bolatyn. Qadirleý men qoshemetteý, aq adal eńbekti ardaq tutý aqshamen ólshenbese de, ómirsheń ónegeniń tini osylaı sabaqtalýy kerek edi. Adal eńbekti murat tutqan, maqsat etken týǵan elimizdiń tuǵyrly saıasatynyń arqasynda tulǵamyz bıiktep, tuǵyrymyz asqaqtap qaldy. Sol úshin de el Prezıdentine jáne osy máseleni der kezinde kótergen «Egemen Qazaqstan» gazetine alǵys aıtamyz.
Esilbaı QADYRALIN,
Sosıalıstik Eńbek Eri
Kókshetaý
