Qazirgi ýaqytta, sarapshylardyń pikiri boıynsha, qor aktıvteriniń tek 22% sheteldik aktıvterge salynǵan.
2020 jyldyń birinshi toqsanynyń sońynda qazaqstandyqtardyń zeınetaqy jınaqtary 11,7 trln teńgeden asty. Sonymen birge, 2019 jyly BJZQ aktıvteriniń kirisi 6,47%, ınflıasııa deńgeıi 5,4% kóterildi.
Osylaısha, naqty kiris 1,17%-dy qurady, sol jyly S&P 500 ındeksi 30%, Stoxx Europe 600 - 23%, Shanhaı Kompozıti - 22%, Japondyq Nikkei 225 - 18% ósti.
«Mundaı ártaraptandyrý halyqaralyq tájirıbede keńinen qoldanylady: mysaly, Norvegııa Ulttyq qorynyń 60% aktıvteri halyqaralyq qor naryqtaryna salynǵan», deıdi zertteý avtorlary.
Sonymen qatar, zertteý avtorlary BJZQ-ny Ulttyq banktiń baqylaýynan alyp tastap, Parlamentke berý qajet dep sanaıdy. Olar bul ustanymyn bylaı dep túsindirip berdi.
«BJZQ aktıvterindegi sheteldikterdiń úlesiniń artýy azamattardyń zeınetaqy jınaqtaryna jeke menedjerlerdi tańdaý múmkindigin de ártaraptandyrady. Halyqaralyq naryqtarda tereń tájirıbesi bar syrtqy aktıvterdi basqarý menedjmentin paıdalaný aktıvterdiń kiristiligin arttyrýǵa jáne portfeldik táýekelderdi ártaraptandyrýǵa jol ashady. Sonymen bir mezgilde BJZQ aktıvterin saıasattan joǵary ustap, aǵymdaǵy bıýdjettik maqsattarda paıdalanýdy shekteıdi», delingen zertteýde.
Sonymen qatar, osy zertteýdiń avtorlary ınvestısııalardy basqarý, aktıvterdi bólý jáne Ulttyq qordyń, BJZQ, Áleýmettik medısınalyq saqtandyrý qorlarynyń nátıjeleri týraly qoǵamdy tolyqqandy aqparatpen qamtamasyz etýdiń kezi kelgeni týraly da aıtyp ótipti.
«Bul aktıvterdi basqarýdyń ulttyq saıasatynyń zańdylyǵyn kúsheıtedi jáne basqarýshylyq tártip pen sybaılas jemqorlyqty azaıtýǵa septigin tıgizedi», deıdi zertteý avtorlary.
